Net na e clausura di e version 22 di e accion di limpiesa di nos costa y bou lama organisa pa Aruba Reef Care Foundation, su president Sr. Castro Perez a expresa su palabranan di satisfaccion y gradicimento cu e gruponan di boluntario cu a participa ayera.
“E boluntarionan a cumpli debidamente cu nan trabou pa comunidad, asina Perez a bisa na Bon Dia Aruba. Ya caba Sr. Perez a anuncia cu e proximo accion di limpiesa na aña 2017 lo tuma luga riba un diadomingo 24 di september.
For di nan sede di operacion situa na Neptalie Park, Sr Perez a declara cu e actividad aki a “bay tremendamente bon”. Nan a aumenta cu un cantidad di 33 grupo caminda mas cu 700 boluntario a participa. Mas cu 15 area di punta noord te cu punta zuid di nos isla a wordo cubri y haci limpi.
Boluntarionan
Den e accion di limpiesa aki nan tin diferente profiel di boluntarionan di cada grupo cu ta asisti den e accion di limpiesa aki. Tin hendenan di grupo di banco, operadornan di dive, fundacion medio ambientalista y te hasta grupo di comunidad Filipino.
Tambe a participa hendenan grandi y hendenan jong manera ta e caso di e hoben di 17 aña, Josue Arbona kende pa prome biaha a participa den e accion di limpiesa aki. E ta haya cu e tipo di actividad aki ta bon pa pais Aruba. E ta confia cu asina nan por yuda pa e futuro generacion lo hereda un miho pais mas consciente riba nos medio ambiente.
Turistanan
Y manera tur aña tabatin varios turista participando, y nan a bisa cu pa otro aña nan lo bay purba di convence mas turista pa yuda como boluntario.
Den oranan di merdia e participantenan a ricibi y cos di come y bebe y tambe nan a ricibi un certificado di aprecio pa e labor cu nan a realisa na beneficio di nos medio ambiente, specialmente di nos fauna marino.
E aña aki nan a pone extra atencion na e sushinan produci cu plastic. Perez a duna un resultado preliminar caminda e ta indica cu e biaha aki atrobe nan por observa cu e cantidad di mushi a bira menos compara cu añanan anterior.
Un bon indicacion cu el a duna ta un rond di e bisindario di Surfside, un grupo chikito cu a wordo asigna ya cu nan tabatin e sospecho cu e area lo ta limpi. E sospecho aki a bira un realidad, ya cu sin duda nan por a constata cu e area aki tabata bastante limpi.
