MAS: ‘Cla pa drecha problemanan social’

Durante transcurso di e ultimo añanan, por tuma nota cu Aruba a keda confronta cu problemanan social grandi y preocupante. E problemanan social aki a conoce un desaroya negativo den nos comunidad cu a hiba na desempleo, criminalidad, delincuencia hubenil, adiccion, famianan kibra y abuso di mucha. Partido MAS ta cla pa atende cu e problematica aki for di su reis, y tin un plan amplio pa por haci esaki. Na prome lugar Partido MAS kier pone enfasis riba e casonan penoso di abuso di mucha cu definitivamente mester termina. Partido MAS ta condena cada un di e actonan aki y ta kere cu mester introduci un castigo mas severo pa cu esaki.

Partido MAS ta kere den introduccion di un castigo minimo pa abuso di mucha y adulto. Banda di esaki Partido MAS ta kere den conscientisacion di nos comunidad for di un edad hoben riba nan derechonan.

Di e forma aki nos por reconoce y preveni situacionnan indesea. Esaki por medio di programanan di radio, television corant y medionan social. Pa loke ta trata desempleo Partido MAS ta garantisa cu e plan cu partido MAS lo ehecuta den gobernacion, lo crea cuponan di trabou den diferente sector y area. Haciendo esaki lo trece un balansa economico den famianan den necesidad y asina poco poco elimina desempleo. Na mes momento esaki lo tin un efecto positivo den comunidad y automaticamente lo tin menos problema den famia, delincuencia hubenil y criminalidad. Principalmente Partido MAS ta kere cu mester crea confiansa bek den comunidad y crea un speransa nobo pa nos pais.

Partido MAS ta invita pueblo di Aruba pa sigui nos via nos pagina di Facebook y keda pendiente pa haya sa mas di nos plan di gobernacion pa asina hunto nos kibra barera y crea futuro.