Mas di 1000 venezolano a solicita refugio na Brasil

Mas di 1000 Venezolano a solicita refugio na estado di Roraima, Brasil, durante prome 3 luna di aña aki, lo cual ta casi mita di solicitud di refugio cu Brasil a registra durante henter aña 2016, polis federal a informa.

Durante aña 2016 autoridad di Brasil a haya un total di 2.230 solicitud di asilo. E cantidad aki lo aumenta pasobra cerca di 5 mil Venezolano a pidi un cita caba te luna di october, pa asina haci mesun tramite, segun dato oficial di polis federal di Roraima. Segun cifra cu autoridad ta proyecta, Brasil mester alcansa pa final di aña 2017, mas di 6 mil solicitud di refugio di ciudadano for di Venezuela, cu ta un pais den un crisis politico, economico y social.

Polis a registra un aumento di caso den ultimo añanan, di apenas 9 solicitud di Venezolano na aña 2014, te 230 na aña 2015, y finalmente aña 2016 cu 2.230 caso registra. Confronta cu tanto solicitud, polis federal di Roraima, estado situa na frontera cu Venezuela, a crea un forsa special di polis den departamento di inmigracion, cu obhetivo di duna atencion na tur e solicitudnan. “E forsa special a ser crea na september y ta ocupa espacio cu no tabata den uso pa oficina di comisario di inmigracion y su hendenan, cu obhetivo di duna un respuesta na e Venezolano cu ta busca un solucion diariamente,” Alan Robson, comisario di polis a bisa pa e pagina web G1.

Ora cu hende haci e solicitud, anto e tramite ta continua den comite nacional di refugio, cu ta analisa cada caso y ta duna un respuesta. Si e respuesta ta negativo, anto e ciudadano stranhero mester bay for di Brasil. E solicitud di status di refugiado ta e unico solucion cu Brasil por duna na hende inmigrante Venezolano, pasobra nan no por participa den acuerdo di residencia di persona di nacionalidad di estadonan cu ta forma parti di Mercosur, pasobra Venezuela ta suspendi di e bloke aki.

Paisnan cu ta fundador di Mercosur ta Argentina, Brasil, Uruguay y Paraguay. Tur pais a comunica na Venezuela cu nan no tin derecho mas den e organismo regional aki desde dia 2 di december aña pasa, pasobra Venezuela a comete falta grave pa cu e obligacionnan cu nan a acepta di e protocol di adhesion di Mercosur.

You May Also Like

Venezuela: Acuerdo cu Organisacion Pan Americano di Salud pa suministro di medicamento

Gobierno di Venezuela hunto cu Organisacion Pan Americano di Salud (OPS;PAHO) a cera un ...

Enseñansa secundario Argentino den crisis mayor

Den caida liber y acumulando fracaso, e scol secundario Argentino ta duna indicacion cu ...

Periodismo independiente ta keda un reto

WILLEMSTAD- Den un comunidad chikito manera Corsou ta dificil pa aspira pa periodismo completamente ...

Ex-gobernador Mexicano cu tabata fugitivo deteni na Italia

Tomás de Jesús Yárrington Ruvalcaba, ex-gobernador di estado Norte di Tamaulipas- Mexico, cu tabata ...

Mexico: Otro periodista asesina na estado Tabasco

Juan Carlos Huerta, un periodista di radio y television di e estado Mexicano Tabasco, ...

350 victima di traficacion rescata: Aruba tambe a yuda

Polis a rescata casi 350 victima di traficacion na 13 pais den e region ...