(Infobae) – Durante e conversacion “Conectando camindanan pa Derechonan di e Poblacion Venezolano na Colombia” Consultoria pa Derechonan Humano y Desplasamento (Codhes) a revela cu entre januari y augustus di 2021, na Colombia a wordo asesina 362 migrante Venezolano.
Segun e organisacion a detaya, 88.1% di e victimanan tabata hende homber, mientras cu 11.9% tabata hende muhe, Cundinamarca, Norte di Santander, Valle del Cauca, Atlantico y Antioquia ta e departamentonan na unda a registra mas caso den aña aki.
Ademas Codhes a duna di conoce cu hende homber menor di 29 aña, ta e poblacion migrante Venezolano cu mas victima, di acuerdo cu e organisacion, entre januari di 2015 y augustus di 2021, 2.295 Venezolano tabata victima di homicidio na Colombia, e mayoria tabata den e categoria di edad ey. Arma di candela ta e artefacto mas usa den e mayoria di e crimen aki.
Tambe e organisacion a laga den evidencia otro tipo di vulneracion di derechonan humano cu e migrantenan na Colombia ta victima. Di acuerdo cu Codhes, na aña 2020, 1.650 Venezolano a wordo desplasa di e teritorio nacional, na unda Norte di Santander ta e departamento cu mas victima (1.097) despues Cauca (440) y Valle del Cauca (50).
Consultoria pa Derechonan Humano y Desplasamento a informa cu, entre 2017 y 2020, a reporta 33 caso di reclutamento di muchanan y adolescente migrante Venezolano, tanto den zona di frontera, como rural y urbano.
Di mesun manera, nan tambe a indica cu entre 2015 y 2020, mas di 2.300 migrante Venezolano tabata victima di delitonan sexual, 71% di e victimanan ta muchanan menor di 18 aña di edad.
Codhes tambe a alerta cu den ultimo cinco aña, a registra 836 caso di desaparicion forsa di personanan di nacionalidad Venezolano, na unda cu Bogota ta e zona cu mas hechonan registra (311), e resto ta di Magdalena, Valle del Cauca y La Goajira.
