(NLTimes) – Ehercito Hulandes a evacua mas cu 2,500 persona for di Afghanistan den ultimo siman, incluyendo mas di 1,600 persona cu Hulanda como nan destinacion final. E gabinete a reporta esaki den un carta na Parlamento tocante e mision di evacuacion cu a termina ayera, cu un vuelo final for di Kabul na Islamabad cu e ultimo diplomatico y soldadnan Hulandes abordo.
“Ta teribel pa mester bandona Aganistan despues di 20 aña di e forma aki”, minister encarga di Relacionnan Internacional, Sigrid Kaag, a bisa. “Ta cu un curason pisa cu e team di embahada y ehercito a sali cu e ultimo vuelo Hulandes.”
Entre e evacuadonan tin ciudadano Hulandes, interprete y nan famia, y hendenan cu a traha den servicio Hulandes den pasado y pa e motibo aki por ta den riesgo awo cu e Taliban a tuma poder di e pais. Gobierno ainda no por duna e cifranan exacto di cada grupo.
Te cu dia 31 di augustus, Hulanda ta bay mantene un avion, un cantidad di soldad y un team chikito di embahada cla pa transporta mas hende ‘contra tur expectativa actual’ si ta posibel. Sinembargo, no ta bay ta posibel pa evacua tur persona identifica pa parlamentarionan Hulandes. No ta conoci cuanto hende ta kedando atras. E evaluacion di e operacion aki ta bin despues, e gabinete ta skirbi.
Kaag a reconoce riba rednan social cu e retiro di Hulanda ta bay tin ‘consecuencia drastico’ pa e personanan cu ainda no a yega den seguridad. “E compromiso ta keda pa yuda tur esnan cu tin derecho pa bolbe of evacuacion, hunto cu aliadonan internacional, y pa continua sosteniendo pueblo Afgano.”
Empleadonan di servicio di inmigracion IND ta bay continua ta presente na Tbilisi y Islamabad, e aeropuertonan unda hende cu tabata bandonando Kabul pa Hulanda a yega. Asistencia consular pa hende den e area aki awo ta duna for di Den Haag, y talbes den futuro for di un pais bisiña.
Ademas, hunto cu otro paisnan, ta examinando si por haci algo for di Afganistan den futuro pa asisti hende Hulandes y Afgano kende a traha pa Hulanda. Por ta necesario pa tin contacto cu Taliban pa esaki, segun e carta.
Ta ricibiendo e evacuadonan na sitionan di Defensa na Zoutkamp, Huis ter Heide, Harskamp y Amsterdam. Tambe ta bay tin sitionan di vivienda temporal na e municipalidadnan di Nijmegen y Heumen. Algun ta bay na otro pais, mientras otronan ta aloha den e municipalidadnan. “Mirando e presion den mercado di vivienda, esaki por dura mas largo”, e gabinete a adverti.
