Mas di mitar di hobennan na Hulanda no conoce nan derechonan; organisacionnan ta exigi miho educacion

(NLTimes) – Mas di mitar di hobennan entre 12 y 18 aña na Hulanda no ta consciente di nan propio derechonan stipula den Convencion di Derechonan di Mucha. Esaki a sali for di un encuesta realisa entre mas di 1.000 hoben, door di State of Youth NL y NGO Coalition for Children’s Rights.

Derechonan di mucha ta proteha desde cu Hulanda a firma e convencion di Organisacion di Nacionnan Uni (ONU) 30 aña pasa. Desde e momento ey, gobierno tin e obligacion di informa hobennan tocante nan derechonan. Sinembargo, organisacionnan cu ta dedica nan mes na proteccion di derechonan di mucha ta considera cu gobierno no ta cumpli suficientemente cu e responsabilidad aki.

Segun e organisacionnan, hobennan cu conoce nan derechonan bon ta den un posicion mas fuerte pa defende nan mes ora nan derechonan no ta ser respeta. Ademas, nan ta considera cu conocemento tocante derechonan di mucha y participacion activo di hobennan ta fundamental pa cumpli cu e obligacionnan stipula den Convencion di Derechonan di Mucha.

E hobennan cu a participa den e encuesta a duna gobierno un calificacion di solamente 3,8 riba un escala di 1 te 10, relaciona cu e manera cu gobierno ta scucha nan opinion. Esaki a pesar cu mucha y hoben tin derecho pa expresa nan opinion y pa nan punto di bista ser considera den asuntonan cu ta afecta nan.

Marc Dullaert di KidsRights, fundador di State of Youth, a enfatisa cu participacion ta forma e base di democracia. Segun e, si e generacion mas hoben no ser involucra den procesonan democratico, futuro di sociedad por ser poni na riesgo.

Dullaert a señala cu educacion tocante derechonan di mucha ta esencial, pasobra sin conocemento di nan derechonan, hobennan no por participa di manera efectivo den sociedad. P’esey, el a boga pa haci educacion tocante derechonan di mucha obligatorio den scolnan.

E organisacionnan cu ta defende derechonan di mucha ta haci un yamado na gobierno Hulandes pa cumpli cu e obligacionnan di e convencion internacional.

Diamars, nan a entrega un relato na miembronan di Parlamento, den cual nan ta presenta e preocupacionnan di hobennan relaciona cu e manera cu nan derechonan ta ser respeta y aplica den practica.