(AP)—Actor di “Friends” Matthew Perry, di ken su personahe den e programa Chandler Bing tabata entre e personahenan riba television mas stima y cita, a muri na edad di 54 aña. E actor a ser descubri morto na su cas na Los Angeles, segun e registro di mortuorio. Un investigacion den su fayecimento ta andante, y por dura par siman prome cu determina e causa di su morto.
Perry a ser descubri den un jacuzzi na su cas, segun fuentenan anonimo cita pa Los Angeles Times y TMZ, cual tabata e prome reportahe di e noticia. Polis LAPD Drake Madison a conta AP diasabra cu agentenan a bay controla “un investigacion di un hende homber den su 50 añanan.
E dies temporada cu Perry a hunga riba Friends a haci’e un di e actornan mas reconoci den Hollywood, actuando banda di Jennifer Aniston, Courtney Cox, Matt LeBlanc, Lisa Kudrow y David Schwimmer como un grupo di amigonan bibando na New York.
Perry a comparti tocante su problema cu adiccion pa basta aña, skirbiendo den su memoir cu a sali aña pasa: “”Hi, my name is Matthew, although you may know me by another name. My friends call me Matty. And I should be dead.”
“Friends” a hunga for di 1994 pa 2004, ganando un premio Emmy pa Best Comedy Series na 2002. E elenco a uni hunto pa obtene un salario di 1 miyon dollar pa episodio cada un. E serie tabata un di e programanan mas famoso riba television y a tuma un bida nobo—y a haya popularidad entre e generacion mas jong tambe—den e ultimo añanan.
Perry a ricibi un nominacion Emmy pa su rol den “Friends” y dos mas pa su aparencia como un consehero di Cas Blanco den “The West Wing.” Perry tabatin varios rolnan conoci, actuando hunto cu Salma Hayek den e comedia romantico “Fools Rush In” y Bruce Willis den e comedia criminal “The Whole Nine Yards.”
Perry a nace dia 19 di augustus, 1969, na Williamstown, Massachusetts. Su tata ta actor John Bennett Perry y su mama, Suzanne, a sirbi como secretaria di prensa di Prome Minister Canades Pierre Trudeau.
