Home Local ‘Mayoria di aumento di personal ta den cuerpo uniforma y enseñansa cu...

‘Mayoria di aumento di personal ta den cuerpo uniforma y enseñansa cu mester di nan’

485

Aunke Raad van Advies (RvA)  y CAft a critica riba aumento di personal na servicio di gobierno contra palabracionnan haci, minister di Financia, Xiomara Ruiz-Maduro (MEP) ta laga sa cu tin argumento cu ta hustifica e situacion aki.

Un di nan tin di haber riba necesidad di personal den e diferente cuerpo uniforma y tambe den sector di enseñansa. E ta splica cu e aumento aki ta wordo refleha den e presupuesto 2018 riba  e dos sector gubernamental aki. Nan a pone esaki den nan contesta pa RvA.

Ayera miembro di e unico fraccion di oposicion, Michael Lampe (AVP),  a haci referencia cu compara cu 2017 den e presupuesto 2018 ta para 100 personal extra den servicio di gobierno. Si aña pasa tabata 300, aworaki den e presupuesto 2018 ta aparece 400.  A pesar cu gobierno a anuncia cu lo hiba un maneho stricto pa baha gasto debi na e situacion di deficit financiero su nan hereda, e echo cu gobierno actual su personal a aumenta no ta cuadra cu e realidad cu nan a yega di expresa, asina parlamentario Lampe a yega di señala.

E mandatario Ruiz-Maduro a declara na Bon Dia Aruba cu un ehercicio cu nan a haci na comienso di gobernacion tabata pa reduci e personal cu nan a haya caba. Sinembargo e ta argumenta cu e parti di personal den aparato gubernamental ta ‘algo cu ta keda dinamico’. E maneho vigente ta pa no tuma personal nobo den aparato gubernamental. Pero e ta aclaria cu e parti aki no ta conta pa e personal di cuerpo uniforma ya sea di polis, duana, etc.. Pero tambe e personal cu ta traha riba tereno di enseñansa. E dos sector aki como pais e ta haya cu nos no por tin e limitacion di reduci of no tuma mas personal na servicio.

Igualmente tin  gruponan cu ya caba tabata ta den training durante e gobernacion ultimo y cu e continuacion di gobernacion ta hiba cu ta yega un momento cu nan mester drenta den funcion di gobierno oficialmente. Esaki ta un proceso – segun e mandatario- cu bo no por kita a pesar di e cambio den gobernacion. Ta e caso di un grupo grandi cu a caba un curso di duana cu a integra den e cuerpo uniforma aki.

E mandatario a menciona cu berdad RvA a trece e punto di aumento di personal dilanti. Den nan contesta gobierno a amplia riba e parti aki y nan ta splica na unda e personal ta aloca. Pero mirando e sensibilidad riba e topico aki, ya cu CAft a cuestiona, no aworaki pero antes tambe como gobierno, riba e costo di personal cu ta sigui subi. “Sigur ora cu RvA ta duna un conseho asina e ta bin na atencion”, e minister ta bisa.

Debi na esaki tambe durante e debate publico cu lo tuma luga pronto den parlamento pa trata e ley di presupuesto, gobierno lo amplia mas ariba e parti di aumento y gasto di personal pa duna un bon splicacion y transparente pa pueblo. Tambe e ta haya cu esaki lo ta un forma pa no haci politikeria cu e asunto aki.

Minister Ruiz-Maduro a indica cu ora di traha presupuesto, informacion ta wordo manda. Pero e informacion aki ta uno cu por cambia pasobra e ta un informacion di e momento ey. Sinembargo tin cambionan cu continuamente ta tuma luga. El a cita como ehempel cu ora nan a drenta gobierno nan a haya hopi hende trahando a base di contract. Na su oficina mes el a haya cuater profesional na servicio a base di contract cu el a dicidi di no prolonga.

Tin algun di nan cu ta bay corte, ya cu no tin motibo pa kita nan. Pero tin otronan cu tabata falta un, dos of seis luna pa nan contract vence pa sali di nan payroll. Tin mas ministerio y departamento cu tin situacion similar y cu ora nan contract vence, esaki lo keda refleha den e reduccion di personal.