Medida contra UTV/ATV… ‘Cañon pa mata musca’…?

E medida di gobierno pa cera acceso pa trafico na costa nort radicalmente ta parce mas y mas uso di ‘un cañon pa mata un musca’. E ciere no solamente ta afecta e companianan cu ta explota vehiculo di tur tereno (ATV/UTV). E clausura di e area den publicidad ta ser pinta como un medida contra ‘pueblo en general’, cu no tin acceso mas, por lo menos no cu un vehiculo. E impresion aki ta facilmente crea, pasobra tabata trata di un medida tuma den un gran apuro, hustamente pasobra gobierno no a interveni na tempo cu un plan viable y creible, cu di berdad lo a ataca e problemanan real di destruccion di naturaleza cu ta tumando lugar. Y lo ironico, pa no bisa cinico, di henter e situacion ta cu e ciere di e ruta di costa nort no ta atende e problema mes, den interior di nos isla, unda tur area natural cu no ta pertenece na e parque nacional ta sufriendo keto bay di e libertinahe cu e empresanann menciona por permiti nan mes, pasobra gobierno no ta actua. Kico por ta consecuencia di loke gobierno a haci? Cu dado momento no por haci otro cu habri e ruta di costa atrobe, mientras e destruccion den e otro areanan menciona no a haya NINGUN solucion… Y esaki mientras riba internet tur hende por mira loke na 2024 tabata aparece den prensa local, e anuncionan gubernamental cu ta bay regula y reglamenta e sector y ta di supone cu te awe e empleadonan publico responsable pa formula hunto cu nan mandatario(nan) un maneho efectivo, tabata ‘bezig’, manera e palabra tipico ta bisa. Esey pa sigura cu nan no tabata sinta cu braza cruza, pero no a mira resultado y nos ta mes leu cu par di aña atras.Mientras tanto nos ta mira henter un discusion, segun nos grandemente inutil tumando lugar tocante loke nos ley di Desaroyo Teritorial (ROP) y e Plan cu regla pa cada zona y subzona (ROPv), mientras ta otro medida legal mester pa atende e asunto aki. Mester di prohibicion di usa ruta no oficial y pone castigo pisa riba ‘creacion’ di ruta nobo, segun conveniencia y placer di tal o cual empresario, cu talvez ta pronuncia palabra bunita tocante conservacion di naturaleza, pero e practica cu nos ta mira ta otro. E ineptitud den actuacion gubernamental ta haci cu e empresanan di e sector tin dos carta pa hunga: e pan di nan empleadonan cu lo ta na peligro y e descontento publico pa via di ciere di e caminda costero. Ban cuminza cu e empleo cu e sector ta brinda. Si acaso gobierno ta desea di elimina e sector, esaki ta solamente posible cu un plan, den cual gradualmente ta ‘phase out’ e actividad economico. Pero, esey no ta parce nos necesario, basta bin cu un plan – urgente – di regulacion di e sector. Esaki sin duda algun lo tin por ehemplo limitacion di e gruponan di UTV/ATV den cantidad di vehiculo den cada salida; limitacion di excursion na rutanan legalmente aproba, y un control severo riba violacion di e reglanan aki. Tambe un eliminacion – gradual – di vehiculo di combustible y cambio obligatorio pa vehiculo electrico. E argumento cu e actual empleadonan lo no por pone ‘pan riba mesa’ mas por keda atendi di un manera responsable. Mirando e demanda, ainda hopi grandi di personal den varios sector, no mester ta dificil di haya otro empleo. Pa loke ta e ciere di e ruta di costa: ta recomendable pa mas pronto posible deshaci di e cañon pa mata musca aki. Pero, si no por cuminza di biaha cu cera e rutanan alternativo, crea riba tereno publico sin permiso y haciendo daño na naturalezaden e area, anto e resultado lo ta cu e empresanan di e sector ta gana e bataya, sin entrega nada. Pa loke ta e aspecto legal aki: no ta asina cu mester di cambio di ROP pa por actua contra e libertinahe cu ta permiti actualmente. No ta asina cu tereno di propiedad publico (domeingronden) ta na disposicion di tur ciudadano pa haci y deshaci ‘como les de la gana’. Mescos cu bo no por tira sushi unda cu bo kier, bo no por traha caminda cu bo vehiculo 4×4 manera bo ta haya ta bon. Ta logico cu bo no por traha caminda riba tereno di otro sin siquiera puntra. No ta pornada mas di 200 aña pasa, Aruba tabatin cuidador di mondi (boswachter), pa por controla e cortamento di mata indiscrimina pa usa pa kima kalki, den forno di aloe y den cushina. Ta con un gobierno den e era moderno aki ta kere cu por cuida propiedad publico, cu e problema adicional di escasez di tereno birando cada vez mas grandi, sin dedica recurso na cuida e propiedad?Y ki dia nos a yega di tende nos prlamentarionan bisa cu ta cuestion di cuida patrimonio nacional manera mester? Nos ta keda tende e declaracionnan gratuito cu mester tene cuenta cu tur interes envolvi; esey nan no mester di bisa publico; tur hende sa esey. E problema anto no ta solamente e ciudadano iresponsable cu ta destrui naturaleza, pero mas ainda un gobierno inepto cu ta prefera di no actua. Nos ta curioso pa sa kico huez ta haya di e asunto aki den e caso cu fundacion ABC a entama contra gobierno. Por ta cu e ta bira otro caso unda huez ta obliga di constata cu ta gobierno no ta actua na tempo, y dia nan actua ta exagera grandemente…