MEP ta pidi claridad tocante posible impacto di regularisacion di migrantenan riba gasto y entrada di AZV

Fraccion di MEP den Parlamento a manda 13 pregunta por escrito pa Minister di Salubridad, Mervin Wyatt-Ras, tocante e posible impacto financiero cu regularisacion di trahadornan migrante por tin riba AZV. E preguntanan ta bin despues cu Centrale Bank van Aruba (CBA) a calcula, den su Economic Outlook – Real Sector di september 2026, cu si alrededor di 5.800 permiso otorga resulta den e mesun cantidad di asegurado adicional, esaki por representa indicativamente Afl. 26,1 miyon na gasto medico adicional pa aña. CBA ta enfatisa cu e cifra ta basa riba un calculacion preliminar y no un proyeccion definitivo. MEP kier sa, entre otro, si AZV y gobierno a haci nan propio calculacion, cuanto persona regularisa ya ta sigura y con e posible gasto adicional lo ser financia.

Den e Economic Outlook, CBA ta dedica un seccion special na escasez di trahador y e implicacionnan economico di legalisacion di migrantenan indocumenta na Aruba. Segun CBA, Aruba historicamente ta depende considerablemente di trahadornan di exterior, mientras demanda pa labor den añanan reciente a crece mas lihe cu oferta local, particularmente den turismo.

Den e contexto aki gobierno a introduci e trayecto Hunto Pa Progreso na 2025, cu e meta di facilita integracion formal di inmigrantenan sin permiso di residencia den mercado laboral. Door di otorga permiso di trabao, e intencion ta pa uza e potencial laboral di e grupo aki y asina alivia escasez di personal.

Den un analisis anterior di Bon Dia Aruba tocante e posible contribucion di migrantenan na AZV, informacion obteni di DIMAS a indica cu na 2025 a registra provisionalmente 6.990 peticion relaciona cu trabao dentro di Hunto Pa Progreso, di cual alrededor di 81% a ser aproba. Pa 2026, DIMAS tabatin registra 16.566 peticion te na e momento cu e informacion a ser obteni. Sinembargo, BDA a señala cu no tabatin claridad si e ultimo cifra ta inclui tur tipo di peticion of solamente prome peticionnan.

CBA, pa su parti, ta señala cu reportahenan reciente ta indica cu alrededor di 5.800 permiso a ser otorga, di cual aproximadamente 1.600 ta temporal. Banco Central ta indica cu si un parti di e personanan regularisa ya tabata traha informalmente na Aruba, nan formalisacion no necesariamente ta nifica cu oferta real di trahador ta aumenta cu 5.800 persona. Den tal caso, un parti di e cambio ta principalmente un transicion di trabao informal pa trabao formal.

E formalisacion, sinembargo, por tin efecto riba finanzas publico y fondonan social. Segun CBA, incorporacion di trahadornan anteriormente indocumenta den economia formal ta amplia e base fiscal y contribucionnan social. E cantidad di entrada adicional lo depende, entre otro, di e nivel di salario di e trahadornan formalisa. Si un parti grandi di nan ta haya salario relativamente abao, e entrada adicional por keda limita.

Precisamente na e punto di AZV ta unda CBA su analisis a genera e preguntanan parlamentario. Banco Central a uza e informe anual di AZV pa 2024 como base pa un calculacion indicativo. Na 2024, gasto total di cuido medico tabata Afl. 487,9 miyon, mientras tabatin 108.378 persona sigura. Esaki ta representa un gasto promedio anual di aproximadamente Afl. 4.502 pa cada asegurado.

Si, como un ehempel teoretico, tur e 5.800 permiso menciona resulta den 5.800 asegurado adicional bao di AZV, e calculacion ta produci un posible aumento di alrededor di Afl. 26,1 miyon na gasto medico pa aña. E cifra aki ta loke a bira punto central den e preguntanan cu fraccion di MEP a manda na Gobierno.

CBA ta adverti cu no por interpreta e Afl. 26,1 miyon manera un proyeccion definitivo. Tin informacion limita tocante composicion demografico di e personanan cu lo bira elegibel pa AZV y tocante nan uzo di cuido medico. Ademas, costo adicional di un asegurado nobo no necesariamente ta igual na gasto promedio di tur asegurado, entre otro pasobra un parti di gasto di sistema di salud ta costo fiho.

Si e migrantenan regularisa ta mas hoben cu poblacion promedio, por ehempel, nan gasto medico promedio por ta mas abao. Di otro banda, CBA ta menciona e posibilidad cu personanan cu anteriormente no tabatin acceso completo na seguro por haci temporalmente mas uzo di servicio medico despues di bira sigura, pa necesidadnan cu anteriormente a keda posponi.

Fraccion di MEP ta pidi gobierno pa splica con e ta evalua e analisis aki y specificamente e cifra indicativo di Afl. 26,1 miyon. E fraccion kier sa si e ministerio responsabel y AZV ya a prepara nan propio calculacion di e consecuencia financiero di regularisacion pa fondo di AZV y, si esaki ta e caso, pa gobierno entrega e calculacion na Parlamento.

Otro pregunta ta cuanto di e personanan cu ya a ser regularisa efectivamente ta sigura actualmente bao di AZV. E punto aki ta importante, pasobra CBA su calculacion ta basa riba e suposicion cu cada un di e 5.800 permiso otorga lo representa un asegurado adicional. CBA no ta establece cu esaki efectivamente ya ta e situacion.

MEP ta pidi tambe un proyeccion di cuanto asegurado nobo pa AZV gobierno ta spera como resultado di Hunto Pa Progreso durante 2026 y 2027. E fraccion kier sa si e fondo di AZV ta financieramente prepara pa absorbe un eventual aumento structural di gasto sin cu calidad, accesibilidad of continuidad di cuido pa aseguradonan actual ser afecta.

E preguntanan ta inclui tambe e aspecto presupuestario. MEP ta pidi gobierno indica si den presupuesto actual di AZV of di Pais Aruba ya tin espacio reserva pa posible gasto adicional. Si AZV efectivamente enfrenta un gasto adicional di Afl. 26,1 miyon, e fraccion kier sa ken lo carga e costo: fondo di AZV, presupuesto di Pais Aruba, dunadornan di trabao, aseguradonan nobo via prima, of un combinacion di diferente fuente.

Na mesun momento, MEP ta busca claridad tocante e entrada adicional cu regularisacion por genera. Mas trahador den economia formal por nifica mas prima AZV, loonbelasting y otro entrada fiscal. E fraccion kier sa con gobierno lo compara e entrada adicional aki cu e posible aumento den gasto medico.

E punto aki a ser analisa anteriormente pa Bon Dia Aruba. A base di cifra di SVb, BDA a señala cu e cantidad di empleado registra a aumenta di 46.136 na inicio di 2026 pa 48.866 pa 1 di juli, esta 2.730 empleado adicional den prome seis luna. A base di e ritmo di crecemento, e analisis a calcula cu cantidad di empleado registra por acerca 52.000 pa final di 2026, alrededor di 6.000 mas compara cu comienso di aña. E cifra ta un proyeccion indicativo y no un dato definitivo.

BDA a calcula tambe e posible efecto di tal aumento riba entrada di AZV. A base di un calculacion teoretico di contribucion promedio, 6.000 empleado adicional por representa alrededor di Afl. 30 miyon na prima AZV adicional. E cifra no ta un proyeccion oficial di AZV y no por ser compara directamente cu e Afl. 26,1 miyon di gasto adicional calcula pa CBA, pasobra e dos calculacion ta basa riba supuesto y metodologia diferente. E ta indica, sinembargo, cu pa determina e impacto financiero completo di regularisacion, mester considera tanto posible gasto adicional como entrada adicional genera door di empleo formal.

E asunto ta conecta cu un reto mas amplio pa economia. CBA ta proyecta crecemento di empleo di 5.6% pa 2026 y ta señala cu, mirando e mercado laboral limita, Aruba lo depende fuertemente di importacion di labor. Pa termino mediano, demanda pa trahadornan di exterior por sigui aumenta pa sostene construccion, capacidad turistico adicional y otro actividad economico.

Na mesun momento, inmigracion tin un papel cada bes mas importante den crecemento di poblacion. Segun CBA, crecemento natural, esta diferencia entre nacemento y morto, a bira negativo na 2025. Ademas, enbehecemento di e poblacion ta aumenta dependencia riba personanan den edad laboral pa sostene cuido medico y cuido pa hende grandi. E proporcion di hende di 65 aña of mas pa cada 100 persona den edad laboral a aumenta di 12% na 2005 pa 30% na 2025.

P’esey e debate no ta limita na e pregunta cuanto regularisacion di migrantenan por aumenta gasto di AZV. Formalisacion di mas trahador por amplia e base di prima y genera entrada adicional, mientras un aumento di asegurado por trece mas demanda pa cuido medico. Pa determina e efecto real riba finanzas di AZV, lo ta necesario compara e entrada adicional cu e gasto adicional efectivamente genera, a base di cantidad real di persona regularisa, nan contribucion y nan uzo di cuido medico.

Por ultimo, MEP ta pidi gobierno pa informa Parlamento periodicamente tocante entrada adicional y gasto medico relaciona cu regularisacion. E fraccion ta pidi tambe medida concreto pa garantisa sostenibilidad financiero di e fondo di AZV si cantidad di asegurado sigui aumenta den añanan cu ta bin.