Minister di Salubridad Publico, Dangui Oduber a indica cu e decision pa suspende e transporte pa pashentnan cu ta dialisa por yuda reduci cu 1.2 miyon anual e gasto di AZV.

Sinembargo e decision aki no ta suficiente pa cumpli cu e condicion di Hulanda pa gobierno di Aruba reduci AZV su gasto cu 35 miyon pa fin di aña 2020. El anuncia otro gastonan cu AZV no ta cubri mas. E ta spera cu tur e decision hunto cu nan a tuma mester por yega na e target di 35 miyon.

El a splica cu 133 pashent mester transporte local pa bay dialisa. 33 di nan a wordo identifica como e grupo vulnerabel cu mester di ayudo pa cubri e transporte, y evita cu nan no por haya e tratamento aki. El a lamenta algun publicacion den prensa riba e topico aki. Segun e mandatario nan ta realisando algun ehercicio pa reduci e gasto di AZV sin sacrifica e parti esencial di cuido.

El a referi riba algun reduccion di gasto. Entre nan transportacion pa pashent cu ta wordo dialisa. Pa loke ta trata pashent cu ta wordo manda afo pa tratamento, tur su gasto medico ta wordo cubri pa AZV. Pero si nan ta reduci cu un 50% e suma cu e pashent ta ricibi pa atende cierto gasto personal durante nan tratamento den exterior. E no ta hancra den ley, pero el a bira un compromiso, el a bisa.

Pa sigui baha gasto di AZV e contribucion aki pa acompañante a wordo elimina. Si den caso e pashent mester di un acompañante, pero e no tin modo pa cubri su mes e gasto aki, ya caba AZV a regla na Colombia pa tin un persona cu por yuda e pashent. Oduber a bisa cu e ticket di e acompañante si ta wordo cubri. Pero AZV ta pidi un contribucion di 300 florin na momento cu mester haci e reservacion. Entrante 1 di juli e medidanan aki pa reduci gasto di AZV y cumpli cu condicionnan di Hulanda, ta drenta na vigor.

Un promedio di 40 pashent pa siman ta wordo manda Colombia pa cuido medico, cu nan respectivo acompañante, cu ta bira 80. Pero aworaki e frontera cu Colombia ta keda cera te cu luna di september. Tin caso di pashent cu actualmente AZV ta mandando Hulanda debi na e situacion aki.

Logicamente e decision cu a wordo tuma pa reduci gasto di AZV tin su consecuencianan. Pero nan a percura pa e cuido si ta wordo duna na tur momento, ya cu esey ta esencia di AZV. Esta cubri cuido medico y tratamento pa pashent cu mester di dje.

El a splica cu presupuesto di AZV ta rond di 450 miyon florin. Sinembargo entrada mes di BAZV y prima a cay drasticamente debi na e situacion cu Covid a crea na Aruba. Cada siman AZV ta evalua nan estado financiero cu e departamento concerni di finanzas pa cubri cierto gasto a base di nan prioridadnan.