(AP) — A cambio di un token di criptomoneda, bo por ta doño di un acuarela digital di wowo di Melania Trump.

E ex-prome dama a lansa un empresa e siman aki bendiendo NFTs – non-fungible tokens – riba su website a cambio di un toke Solan, actualmente balora na alrededor di $180 cada un.

Melania ta bay lansa NFTs ‘den intervalonan regular’ riba su website, segun un comunicado di prensa, cu un porcion di e ganashi bayendo na yiunan di criansa. No ta cla cua porcentahe di e ganashi ta bay duna, ni si ta bay haci e donacion na organisacionnan caritativo pa yiunan di criansa specifico.

Aaron Dorfman, presidente y CEO di Comite Nacional pa Filantropia Responsivo, a bisa cu ora un compania ta bisa cu ‘un porcion di e ganashi’ ta bay pa caridad sin indica un suma specifico, ‘ta un advertencia enorme’. “Esey ta nifica cu caridad no ta un parti serio di nan plan”, Dorfman a bisa. “E ta un intento di marketing.”

Famia Trump tin un historia problematico cu organisacionnan caritativo, maske Melania Trump no tabata directamente involucra den un enfrentamento tocante un organisacion cu e famia tabata maneha na New York. Mientras ainda e tabata presidente, Donald Trump a paga un multa di 2 miyon dollar ordena pa corte despues di concede di a usa su fundacion caritativo como su cartera personal. A duna orden pa distribui e multa entre ocho organisacion. A disolve e Trump Foundation.

Ademas, Trump a bay di acuerdo cu restriccionnan si e forma un organisacion of fundacion nobo, y estado di New York a rekeri training obligatorio pa su yiunan, Donald Trump Jr., Ivanka Trump y Eric Trump, kende tur tabata involucra cu e Trump Foundation.

Non-fungible tokens esencialmente ta certificadonan digital di autenticidad cu por mara na arte, musica of cualkier tipo di documento digital. NFT ta confirma propiedad di un obheto door di registra e detayenan den un blockchain, cual ta publico y warda den computernan rond di internet, haciendo e efectivamente imposible pa perde of destrui.

Un NFT di e artista digital Beeple a bende pa casi $70 miyon e aña aki. Esaki a genera un gran interes den e tecnologia digital cu tin varios aña ta existi, impulsa pa e locura di Bitcoin cu a haci blockchain un palabra conoci. Personahenan digital di pushi tabata bende pa sumanan di seis number for di 2017, y awendia por cumpra NFTs di highlight di basketball di LeBron James pa algun par di dollar of hasta casi 250mil dollar.

Mientras hopi biaha ta presenta nan como colectiblenan di hobby pasobra nan valor ta varia, hopi ta trata NFTs como un inversion. Igual cu criptomoneda, nan tin tiki regulacion y cantidad di experto ta adverti contra pone placa den nan.