Melvin Tromp (AVP): ‘Gobierno ta uzando fraccionnan di coalicion manera un grabbelton’

ORANJESTAD – Un biaha mas a keda demostra siman pasa, cu esun cu ta manda den Parlamento, ta gabinete Wever Croes, cu ta dicidi ki ora tin reunion, riba kico tin reunion y ta pone miembronan di e fraccionnan cu ta sostene gobierno, pasa pa muchanan manda cu pa colmo no tin nocion kico nan tin cu haci of no haci.

Melvin Tromp vocero di AVP ta mustra cu siman pasa gobierno a dicidi di bin Parlamento pa duna informacion relaciona cu e comision di supervision financiero caminda en realidad no a bin algo nobo dilanti y cu gobierno ta esun cu tin cu dicidi kico ta bay pasa cu e ley di CAft nobo.

“E falta di seriedad di e gobierno di coalicion a bolbe refleha su mes un biaha mas ora cu practicamente no a duna parlamento ningun informacion valido riba e ley nobo di CAft y kico lo bay pasa dentro di algun siman ora cu e ley aki yega parlamento.

E solo hecho cu secretario di estado Knops a declara cu pa dia 22 di april proximo e ley aki lo keda cla y aproba, ta mustra cu na Hulanda ya no tin mucho cos pa papia ariba, ya cu gabinete Wever Croes ya a bay di acuerdo con e ley aki tin cu bira ya cu tin un acuerdo firma caba cu gobierno di Reino.

E falta di seriedad a manifesta su mes ainda mas ora cu den oranan di atardi ni un quorum e tres fraccionnan por a logra pa e reunion y tur loke minister di financia y minister presidente a bin duna na informacion, en realidad no ta duna ningun claridad riba e ley nobo aki con e comision di supervision lo sigui funciona ora cu e keda presenta na parlamento.

Na final di e reunion fraccionnan cu ta sostene gobierno a dicidi di presenta un mocion den cual nan ta urgi gobierno pa manda informacion of un concepto di e ley aki pa parlamento haya mas claridad kico esaki lo bay bira y con esaki ta hinca den otro.

Sinembargo ya caba gobierno di Reino tin acuerdo cu gabinete Wever Croes riba e particularidad aki y ta tristo cu ainda gobierno no a permiti ni su propio fraccionnan den parlamento, un bista di contenido di e protocol cu a wordo firma na 2018 cu ta permiti CAft sigui cu su trabou di supervision pa cu presupuesto 2019.

En realidad e fraccionnan den parlamento ya ta wordo poni ‘buitenspel’ ya cu tin un protocol caba firma pa prome minister Evelyne Wever Croes y pa minister di financia Xiomara Ruiz Maduro caminda ya gobierno a acepta e condicionnan bou di cual nan lo sigui traha cu Cft y fraccionnan cu ta sostene gobierno por bula riba bula bou ya cu hasta gobierno a priminti gobierno di Reino cu pa dia 22 di april e protocol aki lo pasa pa bira e ley nobo bou di cual Cft lo haci su trabou proximo añanan di e gabinete aki.

Fraccionnan a presenta un amienda caminda den forma contundente a bolbe keda demostra cu nan no tin control riba nan gobierno, cu nan ta un stempel parlamento di prome ordo y tin cu haci loke gobierno dicidi y den e caso aki ya gabinete Wever Croes a dicidi hunto cu Hulanda caba kico tin cu bay pasa of ta pasando caba.

Fuera di a wordo converti den un grupo sin poder algun riba un gobierno cu nan tin cu controla, e tres fraccionnan aki ta parce un grabbelton cu ningun sa kico ta bay pasa cu nan, pero ta gobierno ta esun cu ta hinca man y dicidi kico nan tin cu haci,” Melvin Tromp di partido AVP a declara.

You May Also Like

Parlamentario Endy Croes (MEP): ‘Banda cu Henk Kamp ta ilegal den CAFT awor a perhudica Groningen’

ORANJESTAD – Parlamentario Endy Croes ta keda para ariba cu Henk Kamp mester tuma ...

ATIA a reuni cu Mike Eman y Richard Arends

E siman cu a pasa, presidente di ATIA Ronald van Trigt, hunto cu director ...

Mester bin investigacion profundo riba casonan di corupcion di tereno

Den conferencia di prensa di Partido MEP na comienso di siman, Lider di MEP, ...

E 13.000 cu no a bay vota, e yabi di Aruba su futuro ta den boso man

  Un otro weekend di fiesta, show y intimidacion politico a pasa. Y ainda ...

oduber, herde

Rene Herde: ‘Nos ta sinti boso dolor’

Sarah Wescot Williams di St. Maarten a bis’e na Ingles: “We feel your pain.” ...

Entregamento di lista: 3 partido so tin permiso pa celebracion

Ministerio Publico (OM) y polis ta hibando un maneho di zero tolerancia awe na ...