Servicio di control di Producto y Higiena ta informa cu durante un accion recien pa controla higiena di restaurant, nan a cera menos luga cu un accion similar dos aña pasa.
Hefe di Dienst Warenkeuring en Hygiene (DWH) ta informa cu recien a termina un accion cu a enfoca riba inspeccion di localidadnan, entre otro restaurant riba henter isla. E accion tabata den colaboracion di Cuerpo di Bombero, DOW y Seccion servicio di malesanan Contagioso (DBZ).
Segun hefe Yvette Geerman, e departamento ainda ta analisando e resultadonan di esaki pa haya sa con e accion a bay. Sinembargo el a declara cu por a mira cu menos localidad a wordo cera pa via di infraccion riba exigencia di higiena, compara cu un accion similar cu a tuma luga 2 aña pasa.
E direccion cu e departamento kier bay cu e accionnan aki ta pa yega na 0 localidadnan cera pa via di higiena.
Conscientisacion di pueblo
Sra. Geerman ta enfatisa cu Departamento di Salud Publico (DVG) ta kere den conscientisacion di e publico en general. Di banda di comerciantenan y consumido e departamento ta purba conscientisa riba importancia di higiena den un localidad pa medio di por ehempel parti foyeto riba e topico.
“Nos ta kere cu mas e pueblo sa, mas problema por wordo preveni riba tereno di salud publico.”
Sinembargo sra. Geerman a expresa cu e localidadnan tin cu cumpli segun ley, pues ora di cera un localidad esaki ta e paso mas grandi cu e departamento por haci pa exigi cu e problemanan di higiena wordo drecha.
“Nos ta keda activo y controla pa asina preveni cu cosnan por bay malo. Alabes nos como departamento semper lo t’ey pa duna guia of informacion riba topico di higiena y salud.”
