Lider di MEP Evelyn Wever-Croes traves di un grabacion, a manda palabranan di condolencia y convivencia pa e famianan di e victimanan di e tragedia diamars ultimo na Boegoeroei. “Mi palabra di condolencia y convivencia ta bay na famianan di e victimanan.
Mi ta spera cu Dios por duna nan forsa den e temponan dificil aki, y cu e victimanan sosega na pas. Mi pensamento tambe ta bay na demas agentenan policial envolvi, y mi ta desea nan forsa den e temponan dificil aki. Mi ta extende palabranan di condolencia y convivencia tambe na henter e Cuerpo Policial, pasobra un agente policial cu perde su bida na pia di trabou ta un sla duro pa henter Cuerpo.
Cu Dios duna boso forsa, y duna mando policial forsa y sabiduria pa guia e Cuerpo den e temponan dificil aki. Aruba ta pasando den momentonan dificil pa loke ta criminalidad, y nos mester di un Cuerpo fuerte pa combati criminalidad cu man duro. E tragedia a pone mi para keto tambe na e estado di cuido di salud mental na Aruba. Nos no tin un cuido di salud mental adecua na Aruba, y eynan nos a faya. E problema di salud mental y di esunnan cu tin problema di salud mental y di abuso di droga, ta serio na Aruba, y tin hopi famia destrosa. Famianan cu ta busca ayudo y cuido pa nan ser keri pero no ta haya.
Nos sa di mas ciudadano cu mester haya cuido di salud mental, pero no ta haya e cuido adecua. Nos ta di ciudadanonan cu mester wordo interna, pero aki na Aruba nos no tin un instituto pa interna. Esaki no ta e momento pa punta dede ken tin culpa of laga. Ban uza e momento aki pa uni den nos compromiso pa algo asina no sucede nunca mas. Nos compromiso ta pa brinda cuido di salud mental, e luga cu e mester.
Y brinda un cuido di salud mental digno na Aruba y pa construi un instituto pa interna esunnan cu mester di cuido mas intensivo. Nos compromiso ta pa brinda Cuerpo Policial mas personal y material pa nan por eherce nan trabounan mas miho, y pa protege nan mes. Asina so nos por percura cu locual a sucede ayera, no pasa nunca mas. Cu Dios duna famianan di victimanan forsa, y cu e victimanan sosega na pas”, tabata palabranan di lider di MEP Evelyn WeverCroes.
