MEP: ‘Nos ta tene cuenta cu programa di partido, no relacion personal’

Despues cu Evelyn Wever Croes lider di partido MEP a termina di tene deliberacion cu gobernador Alfonso Boekhoudt ayera, el a bisa cu den caso Gobernador no ta scoge Mike Eman pa forma parti den proceso pa un informado y un formado di gobierno, MEP si lo ta dispuesto pa tuma parti den e proceso aki.

 Sra. Evelyn Wever Croes ta splica cu en principio actualmente no lo tin problema pa traha hunto cu cualkier otro partido pa forma un coalicion den gobierno. Sinembargo e lider di partido a expresa un biaha mas cu tin un excepcion pa partido AVP.

“Pa mi ta mas importante pa tene cuenta cu e diferente programa di partido cu a wordo presenta. Ora bo wak e programa di MEP y programa di partido AVP bo ta wak cu nan ta completamente diferente. Por ehempel di parti MEP, nos prioridad number 1 ta pa combati corupcion, mientras AVP ta crea ley pa facilita corupcion. Alabes si bo wak entre partidonan MEP, RED y POR, bo ta wak cu e enfasis cu e programanan tin ta hopi similar.”

E punto di sra. Wever Croes ta cu e programanan di AVP y MEP no ta concorda, pues si nos mester forma lo tin hopi discusion cu mester tuma luga. E ta subraya cu no ta trata aki di relacion personal cu tin entre MEP cu AVP. “Si tabata trata di esaki nos no lo considera mes pa forma coalicion, por ehempel cu Otmar Oduber pasobra nos tabata enemigo den pasado.”

Encuanto e topiconan cu a wordo toca durante e deliberacion, sra. Wever Croes ta nenga di splica den detaye, ‘ya cu mi a priminti di no divulga detaye di loke a wordo papia’. Alabes e ta splica cu a pidi elaboracion riba nos puntonan mas importante como partido, pues combatimento di corupcion y drecha situacion financiero di Aruba. “Riba esaki si mi por divulga pasobra ta puntonan cu nos sa ripiti continuamente.”


Tuma tempo pa forma coalicion
Sra. Wever Croes ta expresa cu e proceso aki ta sumamente importante, pa por yega na un gobierno stabiel. “Nos tin cu evita cu por ehempel a lubida di delibera riba un punto importante y e gobierno ta basha abou pa via di esaki.”

MEP no ta ansha pa drenta gobierno. “Si nos mester keda den oposicion, nos lo haci esaki. Nos no tin nada mas di perde. Un cos pega pura pura na otro no lo sirbi e pais aki, pues e proceso mester tuma su tempo. E veredicto aki cu pueblo a bin cu ne no ta facil, pero tampoco e ta imposibel.” Segun sra. Wever Croes, esaki ta un bon tempo pa scucha bon kico pueblo tin di bisa, ya cu a perde hopi confiansa den politica caba.

“Ta un bon momento pa nos haci uzo di e oportunidad cu esaki ta ofrece y posiblemente trece confiansa bek den politica pa den futuro posiblemente no tin un gobierno di coalicion mas. Aruba tin 16 aña sin a wak un gobierno di coalicion, pero segun e lider di partido nos no ta contra esaki. Naturalmente lo nos a kier diferente, pero pueblo a papia caba.”

Sra. Wever Croes a declara cu e lo warda hunto cu partido MEP e decision di gobernador y tuma e tempo cu tin pa delibera cu personanan den organisacion di MEP pa ta mas informa cu ta posibel. “Mi ta papia aki di ex minister, ex politico y otro personanan cu sa di e materia.”

 

 

You May Also Like

‘Minister scorpion awor ta cuestiona trabou di gabinete Mike Eman’

Parlamentario pa fraccion di AVP, Arthur Dowers ta mustra riba curashi di minister scorpion ...

‘Kende pa culpa?

Ora cu un situacion desafortuna presenta, e prome pensamento ta, ken pa tira e ...

PPA ta demanda aclaracion di Gab. Eman relacion cu aumento di gasolin atrobe

Gasolin ta bolbe aumenta entrante diaranson 10 di mei 2017 !! Esaki gobierno p/m ...

Mike Eman invita pa duna lectura na Hulanda

Specialmente pa su vision y añanan di dedicacion na duna un contenido nobo na ...

Richard Arends no por bisa si lo ta dispuesto pa lidera AVP of no

For di siman pasa a cuminsa circula varios rumor cu Richard Arends lo bira ...