Parlamentarionan di MEP, Shailiny Tromp-Lee y Hendrick Tevreden ta haciendo un yamado na gobierno pa resolve urgentemente e impasse rond di sector di tour operator na Aruba, advertiendo cu centenares di trabao y negoshi local por ta den riesgo, mientras operadornan ta sigui warda pa claridad tocante ruta y regulacion.

E parlamentarionan a expresa esaki den diferente comunicado di prensa, cu ta yega despues di un reunion entre fraccion MEP y representantenan di sector di tour. Tromp-Lee a bisa cu e situacion a alcansa un punto critico y a bisa cu casi mil trahador por keda afecta na final, mientras Tevreden a referi na aproximadamente 800 trahador y nan famia cu ta depende directamente riba sector di excursion.

Ambos parlamentario a enfatisa cu operadornan di tour legal no ta contra proteccion ambiental of regulacion. Segun e informacion presenta pa e sector, operadornan ta dispuesto pa traha cu rutanan estableci, sistema di GPS y reglanan mas cla, pero ta argumenta cu mester desaroya e cambionan a traves di consulta en bes di implementa esakinan abruptamente.

Tevreden a bisa cu e disputa tambe ta exponde problemanan mas amplio dentro di e sector, incluyendo regulacion y aplicacion inadecuado. Un asunto treci dilanti ta e sistema actual di permiso T. Segun e parlamentario, vehiculonan no tin identificacion visible obligatorio cu ta permiti autoridadnan distingui facilmente entre operadornan legal y ilegal.

E operadornan tambe ta rechasa e caracterisacion cu tur compania di tour ta participa den coremento off-road descontrola, bisando cu companianan legal ta haci tour cu guia usando ruta structura existente y GPS.

E controversia ta yega memey di clausura di ruta cu meta pa proteha ambiente natural di Aruba y un caso andando den corte, inicia pa Aruba Birdlife Conservation involucrando Pais Aruba y operadornan di tour. E sector ta argumenta cu clausura abrupto sin consulta previo ta afecta negoshi cu ya a organisa trahador, reservacion y operacion basa riba productonan di excursion existente.

Un keho central di ambos parlamentario ta e ausencia di un contesta coordina di gobierno.

Segun Tevreden, e sector ta bin ta warda mas di tres luna pa contesta concreto. Minister Wendrick Cicilia anteriormente a compromete na coordina un reunion involucrando minister Arthur Dowers, minister Rene Herde, y prome minister Mike Eman, pero segun e comunicadonan di prensa, e reunion no a tuma lugar.

“E proceso hudicial aki no por bira un excuus pa inaccion ni pa un paralisis politico,” Tevreden a bisa, argumentando cu existencia di un procedura di corte no ta elimina e responsabilidad di gobierno pa goberna.

Tromp-Lee a pone responsabilidad particular riba Eman, argumentando cu e prome minister mester reuni directamente cu e operadornan y cu no por keda manda negoshi di un oficina di gobierno pa otro mientras nan futuro financiero ta keda den incertidumbre.

MEP awo ta solicitando un reunion publico den Parlamento pa discuti e asunto y busca solucion concreto. Tromp-Lee a haci un yamado na presidente di Parlamento pa convoca e reunion urgentemente.

 

Mientras tanto, Tevreden a propone pa trece hunto departamento di gobierno, organisacion ambiental y operadornan legal di tour pa establece ruta oficial y zona protegi, identifica vehiculonan autorisa, combati operadornan ilegal y introduci regla mas cla y aplicacion di ley.

E parlamentarionan ta argumenta cu proteccion ambiental y actividad economico no mester ta mutuamente exclusivo, pero cu incertidumbre continuo por afecta no solo compania di tour y nan empleado, sino tambe guia, mecanico, chauffeur di taxi, proveedor y e industria di turismo na Aruba mas ampliamente.

Ayera tardi, minister Herde a indica cu awe diabierna e tin un reunion cu e companianan y operadornan concerni.