Den nos columna di siman pasa, nos a toca e tema di e fin di scarsedad & sufrimento humano, como un posibilidad den un futuro cu no ta ni dje leu for di nos. En berdad 25 – 30 aña ta menos cu un generacion humano. E abundancia radical cu lo bini door di Inteligencia Artificial & Robotica lo cambia e tela mes di civilisacion humano. Pero e siman aki nos no lo papia di e Utopia binidero, pero un periodo cu hopi mas peliger y posibel tension, esta e periodo di transicion entre e sociedad di awe pa esun unda no tin scarsedad material y sufrimento humano mas (Post-Scarcity Paretotopean Society).

Esaki ta hiba nos na e titulo di e columna di e siman aki, esta 100:1. Den cua contexto mi ta pone e number aki? Wel e ta e factor di cuanto Capital lo bira mas potente cu esun di Labor Humano.

Labor Humano lo no existi dentro di 30 aña.

Hopi di nos no ta para keto con rapido Inteligencia Artificial (AI) ta progresando. Segun analisis di Epoch AI, e costo di usa herment di AI a baha cu un factor di 40x pa aña! Awo, mi no ta un hoogleraar econometrie, pero di loke mi sa, e costo di labor humano no ta cayendo cu factor 40x pa aña.

Awe AI ainda ta un herment “cute” y “handig”. Pero esaki ta unda lectornan ta haci fout. Pasobra no tin ningun indicacion cu e tendencia aki lo caba den futuro cercano y mediano. Es decir, e tendencia di prijs pa AI lo sigui baha den e proximo decada aki.

E ora e ta bira un cuestion di con largo prome nan automatisa mi trabao humano?
Esey ta un pregunta dificil y dependiente na hopi factor. Pero segun analisis econometrico, esaki por bira visibel, ya caba na aña 2033. Tambe por nota, cu ora e ola di automatisacion yega, e lo ta un tsunami mes, pa 2045, casi tur trabao humano lo ta automatisa.

Capital pa hisa cu factor 100x

Esaki ta trece nos na unda por bin tensionnan hopi real den tur sociedad rond mundo, si no bin cu bon plan/politica di transicion. Esta cu poder relativo di Capital, versus esun di Labor Humano ta bay explota den un manera cu tiki di nos por echt imagina.

E no ta dificil si pa realisa dicon esaki lo tuma lugar.
Capital ta inverti den AI, cu ta haci AI & Robotica mas miho ainda, cu ta crea mas Capital, cu un bes mas lo bay den AI & Robotica. Asina e circulo vicioso aki probablemente lo bay. E resultado ta, cu na fin di e circulo aki, Labor Humano no lo tin ningun pero ningun voz socio-economico mas, debi cu tur cos por wordo haci door di AI & Robotica pa prijsnan cu un ser humano simplemente no por competi contra dje.

Un grito di auxilio

Nos como sociedad, esta e trahador, esta e gobernante, esta e inversionistanan, mester duna atencion na e tema central aki di Siglo 21, debi cu e efectonan cu esaki lo tin riba e raiz & fundeshi di sociedad henter.

Nos no mester prepara of pensa mañan, nos mester cuminsa actua awe mes. Prome cu ta laat. E Tsunami di Automatisacion ta bay bin sin duda. Awo con nos como pais lo haci pa locual ta entrada di Gobierno cu mayoria ta via loonbelasting, entrada di AZV & SVB cu tambe ta basa riba payroll? Na otro banda con nos por zorg pa e forsa di Capital no bira demasiado potente? Tur esaki ta rekeri discurso intelectual sumamente serio.

Otro siman nos lo ta back, y nos lo skirbi ampliamente di diferente solucionnan pa asina sociedad por transiciona exitosamente na e destino final, cual ta un Post-Scarcity Paretotopean Society