Merca a cambia su discurso di guera pa cu Venezuela, pero ta adverti cu e no lo keda trankil, pa mira e manera cu Venezuela ta cay na pida, pida.

Maduro a solicita apoyo internacional pa impulsa un cumbre di presidente, cu lo discuti e topico di “menasa” di banda di Merca, y Donald Trump contra Venezuela. Maduro a presenta su solicitud di tene un reunion di presidente, na embahador di Spaña, Francia, Hapon, Siria, Vietnam y Guatemala.

“Mi a ratifica, na boso como embahador, mi solicitud pa tur gobierno cu boso ta representa (…) e solicitud cu mi ta presenta ta un reunion presidencial di porta cera pa asina duna atencion na e topico di paz na Venezuela y menasa di un posibel intervencion militar, di banda di e gobierno di Donald Trump contra Venezuela.”

Vice-presidente ta alerta

Den un conferencia di prensa na Buenos Aires, vice-presidente Mericano Mike Pence, y presidente Argentino Mauricio Macri a bisa cu Venezuela ta bibando un “tragedia di tirania”, pero Merca y Argentina ta kere cu e solucion por tin un via pacifico, pa haya democracia bolbe na e pais petrolero.

Pence a mustra aprecio pa tur e reformanan di Macri na Argentina y ccu a mustra su liderazgo den henter region, tocante e preocupacion pa cu e crisis na Venezuela.


“Presidente Trump a manda mi aki pa laga bon cla na Argentina y henter America Latino cu Merca no lo keda cu brasa crusa, mientras Venezuela ta cay na pida, pida,” Pence a bisa.

“Nos ta mira e tragedia di tirania dilanti di nos wowonan.” Pence a recorda cu Trump “a laga sa bon cla cu Merca tin hopi opcion y nos ta mantene tur nos opcionnan.”

Sin embargo, e vice-presidente a papia tocante “aumento di presion economico y diplomatico riba regimen di Maduro. E presion di banda di Merca y di henter mundo, lo permiti pa haya e democracia atrobe na Venezuela.”

Mas refugiado

Mike Pence a lamenta e cantidad di refugiado Venezolano, cu presidente di Colombia, Juan Manuel Santos y presidente di Argentina Mauricio Macri a informa cu nan tin den nan pais. “Un miyon di refugiado na Colombia y mas di 60 mil na Argentina.” Pence a bisa cu “e situacion aki ta absurdo.” Mauricio Macri a splica cu e “manera pa yuda e pais aki no ta e uso di forsa na Venezuela.”

E posicion di Argentina ta mescos cu e opinion di Mercosur. Macri a papia tocante un rechaso di e violencia na Venezuela y cualkier otro opcion cu por concerni e uso di forsa.” Macri a bisa cu nan posicion politico encuanto Venezuela mester bira mas extremo, pa asina reestablece e democracia na Venezuela.

Na Venezuela mes, lo instala awe e comision cu lo husga tur persona considera responsabel pa e violencia politico na Venezuela, segun un decision di Asamblea Constituyente, Delcy Rodriguez a informa.

Di otro banda Maikel Moreno, presidente di Tribunal Supremo di Venezuela a propone pa hisa e condena di delitonan manera traicion di patria y terorismo, cu un condena di mas di 50 aña.

Evo Morales a rechasa intervencion di Merca

Presidente di Bolivia, Evo Morales a considera cu e critica di vice-presidente di Merca, Mike Pence riba Venezuela ta imposibel di acepta, pasobra e ta un intervencion na Venezuela, cu obhetivo di hustifica un “intervencion militar”.

“Inaceptabel intervencion: Merca desde Colombia a acusa Venezuela di tin un dictadura y un estado cu a faya, pa hustifica un posibel intervencion militar,” Evo Morales a skirbi riba su cuenta di Twitter.

Morales a bisa cu Pence, a considera cu “Venezuela ta un estado cu a faya, cu ta menasa seguridad y prosperidad di henter hemisferio.”

Morales ta un aliado di Maduro y el a bisa cu “e unico peligro pa mundo” ta e “odio di rasa cu ta lanta un muraya di violencia.” Morales ta un di presidentenan di region Latino Americano, cu ainda ta mantene su apoyo na Maduro.