(AP) – Departamento di husticia a acusa un hacker Suiso di intrusion di computer y robo di identidad, apenas un siman despues cu e hacker a causa berguensa na un startup Mericano di camara di seguridad y su clientenan, door di mustra con facil ta pa spiona riba e camaranan mirando hospital, scol, y oficina corporativo.
Un acusacion contra Tillie Kottmann, di 21 aña di edad, a keda entrega diahuebs ultimo pa un gran hurado na Western District of Washington, basa na Seattle.
Fiscalnan federal a bisa diahuebs cu Kottmann, di Lucerne, Suisa, inicialmente a wordo acusa na september. E variedad di acusacion ta bay back na 2019 y ta involucra e supuesto robo di credencialnan y data y publicacion di codigo fuente y informacion propietario di mas di 100 entidad, incluyendo compania y agencianan di gobierno.
Kottmann a describi e leak mas recien di imagen di camara saca di clientenan di proveedor di camara di seguridad di California, Verkada, como parti di un causa di ‘hacktivista’ pa expone e peliger di vigilancia masivo. Kottmann a bisa AP den un chat online siman pasa cu nan a haya e credencialnan necesario pa drenta e website expuesto riba internet habri.
Den combersacion cu otro reporteronan aña pasa, Kottmann a bisa cu e data cu el a obtene y post online a ser expuesto pa mal practica di seguridad y nan a busca pa duna berguensa na organisadornan pa asina nan reforsa nan rednan.
Fiscal Mericano interino, Tessa Gorman a rechasa e splicacion aki den un declaracion diahuebs. “E actonan aki por aumenta vulnerabilidad pa tur hende, for di corporacionnan grandi te na consumidornan individual”, Gorman a skirbi. “Mara bo mes den un supuesto motibo altruista no ta elimina e holor criminal di un intrusion, robo y fraude asina.”
Abogado Suiso, Marcel Bosonnet a bisa cu e ta representando Kottmann, pero a nenga di duna mas comentario diabierna.
Bosonnet antes a representa Edward Snowden, ex-contratista di Agencia di Seguridad Nacional Mericano (NSA) kende na 2013 a wordo acusa di revela detayenan di programanan di vigilancia di gobierno, altamente clasifica. Snowden a considera pidi asilo na Suisa.
Autoridadnan Suiso a bisa cu nan a listra cas di Kottmann na Lucerne fin di siman ultimo riba peticion di autoridadnan Mericano. Fiscalnan a bisa cu FBI a tuma un website domain den beslag, cu Kottmann a usa pa publica data horta online.
No a keda cla si fiscalnan Mericano lo purba di extradita Kottmann, kende ainda ta na Lucerne y a wordo notifica di e cargonan pendiente. Ley Suiso ta limita cierto forma di extradicion, specialmente na momento cu por procesa e cargonan den corte local. Ministerio Publico na Lucerne a nenga di duna comentario diabierna, deferiendo na autoridadnan Mericano.
Kottmann a expresa confiansa den e chat online cu AP siman pasa cu Merca ‘no por extradita mi maske nan sa exactamente ken mi ta’.
E acusacion diahuebs ta vincula un cantidad di hack na Kottmann durante ultimo aña, incluyendo un contra un fabricante di aparato di seguridad no identifica basa den region Seattle y otro afectando fabricante di ekipo tactico.
Den varios caso, fiscalnan a bisa cu Kottmann inapropiadamente a usa credencialnan valido di empleadonan pa haya acceso na codigo fuente y basenan di dato. E acusacion ta bisa cu Kottmann tambe a hack e Departamento di Transporte estatal di Washington, un fabricante di automobil, y un compania di inversion financiero.
E acusacion no ta menciona specificamente e hack di perfil halto siman pasa contra Verkada, cual a hala atencion pasobra a expone imagennan en bibo di camara y video den archivo, di scol, prison, fabrica, gym y oficinanan corporativo.
Kottmann a bisa AP siman pasa cu e ta pertenece na un grupo yama APT-69420 Arson Cats, un colectivo chikito di hackernan ‘principalmente queer, sin sosten di ningun nacion of capital pero na luga di esey sosteni pa e deseo pa diberti, ta gay, y un miho mundo’.
Kottmann anteriormente a hala atencion pa leak material cu a hack exponiendo fayonan di seguridad, incluyendo di fabricante di chip Mericano, Intel, aña pasa.
E acusacion no ta acusa Kottmann di purba di extrae placa door di hack victima – un motibo clasico di hopi crimen cibernetico. Pero fiscalnan si ta purba di mara esfuersonan di Kottmann na autopromocion, incluyendo diseño y benta di paña relaciona na hacking y ‘ideologia anti-propiedad intelectual’, den un conspiracion mas amplio pa comete fraude di computer.
