(BBC)—Florida y Texas ta mirando algun casonan local di malaria—e prome plamamento di e malesa di sangura den Merca den 20 aña, autoridadnan ta adverti den un alerta di salud.
Vigilancia activo pa mas caso ta continuo, e Centro di Control di Malesa (CDC) ta bisa. Te awo, e riesgo pa contrata malaria na Merca ta keda extremamente abao, e ta bisa. Tur cinco pashent—cuatro di Florida, un di Texas—a ricibi tratamento.
Malaria ta causa pa medio di un pica di un sangura infecta. Hendenan no por contrata esaki for di otro hende, pero e insectonan por contrat’e for di hende infecta, y asina e ciclo ta sigui. E malesa aki ta comun den areanan di Africa, Asia y Centro y Sur America, pero no den Merca.
Sinembargo, sanguranan Anopheles, haya den varios parti di Merca, por transmiti malaria, si nan pica un hende infecta. E riesgo ta mas halto den areanan unda:
- E clima ta laga insectonan sobrevivi durante mayoria di aña
- Tin biaheronan for di areanan endemico di malaria
- Hendenan infecta por sufri di keintura, sodo exceso y calafriu.
Malaria ta un emergencia y mester ser trata lihe cu medicamento pa asina mata e parasito cu ta causa infeccion. Uzando spuit pa sangura y pa cubri suficiente cu paña por yuda proteha contra pica di sangura.
CDC ta bisa cu e ta trahando cu e departamentonan di salud di Florida y Texas y esnan cu a ser diagnostica y trata “ta mehorando.” Dokternan Mericano ta conseha pa considera malaria den cualkier persona cu un keintura, a pesar di nan historia di biahe, particularmente si nan a bishita of biba den areanan afecta na Florida of Texas.
Florida a publica un alerta di malesanan di sangura despues cu a descubri casonan na Sarasota County y Manatee County, advertiendo residentenan pa basha awa para unda sanguranan por repriduci y bisti camisa di manga largo y carson largo.
