
(AFP) – Departamento di Comercio Mericano a emiti dialuna un regla nobo cu ta busca evita cu companianan Chines usa chipnan avansa Mericano pa inteligencia artificial cu ta instala den data centernan den otro pais.
E medida ta bin algun dia despues cu un scandal di spionahe a obliga Jensen Huang pa laga su posicion como hefe di Nvidia, memey di sospechanan creciente cu posiblemente el a yuda companianan Chines haya acceso na chipnan di AI mas poderoso di su compania, den posibel violacion di reglanan Mericano.
Departamento di Comercio, lidera pa Howard Lutnick, a ser critica pa otro funcionarionan dentro di Cas Blanco di administracion Trump cu segun nan e no a aplica debidamente controlnan di exportacion cu ta prohibi benta di chipnan di AI mas poderoso di Nvidia pa China.
Un di e buraconan tabata permiti companianan Chines huur capacidad computacional pa AI for di centronan di data na Asia Suroriental y otro regionnan cu ta usa hardware Mericano cu no por ser exporta pa China.
Scrutinio riba e buraco ey a aumenta despues cu Huang a renuncia siman pasa pa motibo di su relacion cu Alice Huang, un ex ehecutivo di compania Megaspeed, basa na Singapur.
Investigadornan Mericano ta sospecha cu e cliente di Nvidia a desvia ilegalmente tecnologia di compania pa China.
Segun The New York Times, algun funcionario den Gobierno Mericano tambe ta sospecha cu e por ta un activo di servicionan secreto Chines.
Megaspeed ta bao investigacion Mericano pa posibel violacionnan di control di exportacion y a nenga cu e a haci algo ilegal.
Alice Huang, cu no tin relacion familiar cu Jensen Huang, no a ser acusa formalmente, y Beijing a rechasa e acusacionnan di spionahe.
Secretario di Tesoro Scott Bessent a culpa Departamento di Comercio diabierna pa no pone Megaspeed riba lista preto pa e supuesto violacionnan.
Bao e regla nobo, data centernan den cualke parti di mundo lo mester tin un licencia Mericano pa entrega volumen grandi di capacidad computacional basa riba chipnan avansa na companianan cu sede na China, Macau of otro paisnan bao embargo Mericano di arma.
E regla tambe ta exigi licencia pa manda chipnan avansa pa Singapore, Malaysia, Thailand, Indonesia y Brasil, cu segun Gobierno tin un “riesgo mas halto cu normal di desvio”.
Departamento su Bureau of Industry and Security (BIS) a bisa den un declaracion cu e regla “ta diseña pa sigura cu restriccionnan existente riba acceso na tecnologia Mericano sensitivo no por ser evita via areglonan di computacion remoto cu data centernan den paisnan tercero.”
BIS a bisa cu e regla a ser “skirbi pa y bao direccion di” Departamento di Tesoro y Conseho di Seguridad Nacional.
E regla tambe ta elimina formalmente AI Diffusion Rule cu a ser emiti bao ex-president Joe Biden.
E regla anterior tabata establece un sistema mundial di licencia pa chipnan di AI, pero administracion Trump ya a anuncia na mei 2025 cu e lo elimina e sistema ey.


