Estadonan Uni ta considerando impone sancion riba por lo menos otro 40 tanker stranhero pa opera hunto cu Venezuela, asina cuatro fuente di transporte maritimo a conta Reuters.
E fuentenan a sigura cu e posible sancionnan riba varios embarcacion por ser imponi di manera inmediato, aunke no a tuma ningun decision ainda.
E empresanan cu por ta obheto di sancion por inclui 25 supertanker, cu por transporta un maximo di 2 miyon bari di crudo y 17 barco menor, segun personanan cu conocimento di e tema.
No tabatin comentario inmediato di Departamento di Tesoro Mericano . Cas Blanco y Departamento di Estado no a responde di manera inmediato riba pregunta di Reuters tocante e tema.
Funcionarionan Mericano tabata poniendo di manera constante tanker y compania maritimo riba e lista preto pa nan negoshi cu Venezuela, desde cu Washington a impone sancion riba e pais y a adverti cu lo por agrega mas si no cumpli cu e medidanan.
E siman aki Tesoro a bisa cu a impone sancion riba cuatro compania di nabegacion pa transporta petroleo Venezolano, den e ultimo aumento di esfuerzo di banda di Washington pa para transporte petrolero Venezolano, pa purba saca e presidente socialista Nicolas Maduro di poder, cortando mas tanto posible exportacion di crudo di e pais miembro di OPEC.
Otro parti di e sancionnan ta toca e transporte di gasolin y diferente material pa refinacion, di Iran pa Venezuela. Merca no a stroba yegada di e barconan Irani na Venezuela pero si tabata activo den convence transportadornan maritimo pa no colabora cu Venezuela den transporte di sea crudo o gasolin y otro combustible.
