(AP) — Administracion di Biden a bisa cu oficina di prins Saudi, Mohammed bin Salman mester proteg’e di un demanda pa su rol den e asesinato di un periodista basa na Merca, contradiciendo su denuncianan contra e prins den e asesinato brutal durante e campaña apasiona di Joe Biden.
E administracion a expresa sosten pa inmunidad legal pa prins Mohammed – de facto gobernante di Saudi Arabia, kende tambe recientemente a asumi e cargo di prome minister – contra un demanda di e prometidad di e periodista di Washington Post, Jamal Khashoggi, kende a wordo asesina, y di e grupo di derechonan humano funda pa Khashoggi, Democracia pa Mundo Arabe Awo (Democracy for the Arab World Now).
E opinion di gobierno Mericano pa duna inmunidad na e prins no ta obligatorio, y un hues finalmente ta bay dicidi si ta otorga inmunidad. Asina mes a genera rabia entre activistanan di derechonan y a habri porta pa critica di legisladornan democrata. E movida Mericano a yega mientras Saudi Arabia reforsa medidanan di represalia manera prison contra criticonan pacifico na cas y den exterior, y a reduci produccion di azeta, un movida mira como socavando esfuersonan di Merca y su aliadonan pa castiga Rusia pa su guera contra Ucrania.
Departamento di Estado diahuebs a referi na e decision di e administracion pa protege e prins di cortenan Mericano den e asesinato di Khashoggi na 2018 “un determinacion puramente legal”. A cita loke a yama un precedente largo.
A pesar di su recomendacion na e corte, Departamento di Estado a bisa den su documento cu “no ta asumi un posicion riba e merito di e demanda actual y ta reitera condena indiscutibel di e asesinato horibel di Jamal Khasshogi”.
Oficialnan Saudi a asesina Khashoggi na e consulado Saudi na Istanbul. Ta kere cu nan a corta su curpa den pida, maske su restonan nunca a wordo haya. Comunidad di inteligencia Mericano a conclui cu e prins Saudi a aproba di e asesinato di e periodista conoci y respeta, kende a skirbi criticamente contra e man pisa di e prins pa silencia esnan cu e tabata considera rival of critico.
