Parlamentario Mervin Wyatt-Ras ta trece padilanti cu en conexion cu dia di diabetes, dia 14 di november venidero, Prisma ta organisando diferente tayernan dirigi riba pashentnan cu tin e malesa diabetes tipo 2.

E ta un malesa cu ta afecta hopi di nos hendenan. Por a compronde cu tin mas o menos 4mil pashent cu ta diabetico y cu e cantidad aki cada aña ta aumenta cu 200 pashent. Banda di esaki tin malesanan cronico, entre otro presion halto, malesanan cardiovascular, malesa di pulmon, curason y cancer. Nan ta malesanan cu ta lanta cabes y mester ta al dia pa preveni.

Factornan di riesgo ta estilo di bida, movecion, aspectonan genetico, edad y obesidad. Gobierno anterior den pasado a inverti hopi den prevencion. A bin cu IBISA, a inicia wondenpoli, a bin cu Linear Park pa nos hendenan por cana y move, deporte y praktijkondersteuners den oficinanan di dokternan di cas pa monitor y guia pashentnan cu tin malesanan cronico, ta necesario continuacion di e esfuersonan preventivo aki. Pasobra si no preveni, e pashentnan aki ta termina ta tuma dialisis. Esaki ta un gasto hopi grandi pa AZV y na ImSan so tabatin di 12 pa 18 stoel pa atende pashent. Un total di 68 pa 70 pashent pa siman den 2 turno. Ademas tin pashentnan ta haya dialyse na cas. Mirando esaki ta importante pa inverti den esaki.

Por nota cu Imsan ta continuando cu e proyecto dirigi riba tratamento di cancer. Ta trahando ariba un bunker y esaki ta bayendo hopi bon. Baptist Health a duna cooperacion na gobierno desde aña 2012. A base di reconocimento di JCI, e ora por eleva e credibilidad di e cuido cu ta ser otorga door di e sistema aki di acreditacion. Lo tin reconocimento tambe di e seguronan internacional. Esaki lo haci posibel cu nos pais por bay over na turismo medico. Esaki ta hopi importante, mirando e hecho cu e gobierno actual no a haci nada pa tene Citgo habri y a kita cantidad di hende for di trabou y no tin otro perspectiva pa otro formanan pa sostene nos pilar economico, cu ta turismo.

Desaroyo di turismo medico den futuro sigur lo duna un empuhe na nos economia. Wyatt-Ras ta spera cu e minister aki no mira esaki djis como un proyecto di gobierno anterior. E mester tuma esaki cu mannan habri pa logra cambio positivo riba tereno di salubridad. Hunto cu construccion di e bunker lo construi 2 sala di operacion general y un sala di operacion pa oftalmologia (wowo). E proyecto ta encera 60 miyon y lo por atende 400 pashent di cancer y lo duna 45 persona trabou. E director a indica cu e proyecto lo ta cla pa ser uza na maart 2019.

Pa loke ta e area di salubridad Wyatt-Ras a haci varios pregunta na minister en cuanto entre otro e investigacion na Laboratorio, renobacion di hospital, ley di AruBIG y mas; y te ainda no a ricibi contesta ni despues di a manda un carta di rappel. Ta lamentabel, pero esaki ta cuadra cu e forma con gobierno ta trata parlamento.

Ora cu na fin di e aña parlamentario 2018-2019 a trata e overzicht di trabounan di Staten, a constata cu di e 701 pregunta cu parlamentarionan a haci ministernan, a ricibi solamente 374 contesta, esaki ta un tiki mas cu 50%. Di e preguntanan di fraccion di AVP mescos. Di e 276 pregunta, nos a haya solamente 130 pregunta contesta. Pues nos no ta hayando contesta ariba nos preguntanan. Esaki no ta conta pa e minister aki so, sino tambe pa e minister di enseñanza y esun di asuntonan social y labor. Esaki ta sumamente lamentabel. Rol di parlamentario ta pa controla trabou di minister, y si no ta haya contesta, esaki ta nifica cu gobierno no ta laga parlamento control’e y no ta transparente. Sea ta oposicion of parti di nan friends and family, gobierno mester contesta parlamentarionan. Nos pueblo ta preocupa. Ainda e wachtlijsten pa specialista, dokternan di cas y wachttijden na Spoedeisende Hulp ta halto. Promesanan cu a ser haci y cu no ta ser cumpli. Minister mester ta mas serio pa cu salubridad. Mester atende cu preocupacion di pueblo

 

LEAVE A REPLY

Please enter your comment!
Please enter your name here