Na augustus di 2022 Metabolic Foundation a anuncia nan proyecto Surfside Science cu ta enfoca riba metodonan pa midi calidad di aire, awa di lama, cambionan den costa y vegetacion den fondo di lama e cual a culmina cu un siman di presentacion na augustus ultimo y awor e siman aki nan ta bay na Cas di Cultura pa e clausura di e proyecto.

Pa esaki, Christie Mettes, coordinador di e proyecto a splica cu esaki ta e clausura di e proyecto na unda nan a haya fondonan di Union Europeo door di RESEMBID, cual ta un fondo di e Union Europeo cu ta maneha pa Expertise France, e agencia pa desaroyo Frances cu ta maneha e proyectonan den paisnan den exterior y teritorionan cual ta inclui Aruba y 11 otro isla den Caribe.

Pa cera e programa aki, pa mañan diahuebs nan ta bay ta na Cas di Cultura for di 7:00pm te cu 9:00pm cu un presentacion artistico e cual ta bay ta un presentacion paralelo via online cu Union Europeo pa e programa “citizen science” di Ars Electronica na Linz, Austria pa e actividad aki e entrada ta bay ta gratis.

Ademas di esaki, nan kier presenta loke nan a logra riba dje durante e aña aki di Surfside Science na unda nan kier contribui na resiliencia di Aruba su ecosistema marino y di costa contra e impactonan di cambio di clima. Nan metodo a combina e uso di sensornan electronico, imagen satellite, AI y analisis di potret di bao lama y e resultadonan ta compara y valida door di un ecologo marino usando metodonan standard cu ta wordo usa generalmente den ciencia. E data colecta ta bay di biaha riba nan website pa forma un base pa data cu automaticamente y continuamente por colecta, warda, comparti y analisa data. Tur data ta accesibel pa uso publico y por beneficia specialmente e personanan local cu ta activo den area academico, fundacion, studiante y profesional.

E proyecto aki ta uno di sumo importancia pa Aruba, mirando cu te awo Aruba no ta dispone di suficiente data riba e estado di nos lama y costa. Mettes a splica cu nan a enfoca riba e colecta di data. El a splica sinembargo cu entre nan boluntarionan nan a conta cu varios studiante di PhD cu ta involucra den analisis di e data como tambe studiante di Universidad di Aruba, cu a haci stage cu nan.

Pa personanan interesa di wak e resultadonan cu nan a colecta por subi riba e website: www.science.brenchies.com of www.data.brenchies.com y riba nan Instagram “Brenchies.”