Debilita na categoria 2, 7 di october e horcan Delta a yega na teritorio Mexicano, na isla di Cozumel cu biento di 160 kilometer pa ora prome di yega na peninsula di Yucatan.
Te momento autoridadnan no a informa di victimanan. Pa haci frente di emergencia, a ordena e evacuacion di 39.290 persona y a manda cerca di 10.000 agente di polis y militar.
“Tabata un bon noticia considerando e situacion cu nos ta biba, di espera un horcan di categoria 4 pa categoria 3 y a yega pa categoria 2”, e gobernador di estado di Quintana Roo, Carlos Joaquin a señala.
Pa ricibi e personanan cu tin cu a sali for di zona di peliger, na Quintana Roo a wordo habilita 45 refugio y 29 na Yucatan, Luis Alberto Ortega, director di comunicacion y operacion di Coordinacion Nacional di Proteccion Civil a bisa. Tambe a agrega cu tin 1.901 persona den refugio na Quintana Roo y 810 na Yucatan te momentonan aki.
Ademas, autoridadnan a pone bou proteccion cerca di 30.000 turista mediante sistema di localisacion di bishitante Guess Locator.
Segun a informa ayera Gobierno Mexicano durante un conferencia, Delta por a bandona tera y avansa pa golfo di Mexico, ora tin pronostica cu por bira mas fuerte un biaha mas, te yega na categoria 4.
Di su parti, Centro Nacional di Horcan di Merca, NHC, a alerta na su website cu por causa bientonan peligroso paden di e sector na nort di Yucatan.
