Emma Coronel casa di Joaquín “El Chapo” Guzmán Loera, lider di Cartel de Sinaloa, a wordo aresta dialuna ultimo na Virginia, Merca pa cargo relaciona cu su presunto participacion den narcotrafico internacional.
Coronel Aispuro, di 31 aña, cu ta conta cu nacionalidad Mericano y Mexicano, a wordo aresta na Aeropuerto Internacional Dulles, segun loke un comunicado di Departamento di Husticia di Merca a informa.
Te momento a keda conoci cu ayera diamars e lo mester a bay na Tribunal di Districto di Merca pa Districto di Columbia a traves di un video conferencia.
Segun documentonan hudicial, Aispuro ta acusa di participa den un conspiracion pa distribui cocaina, metanfetamina, heroina y marihuana pa su importacion na Merca.
Ademas, ta informa cu Coronel Aispuro a conspira cu otronan pa yuda Guzman den su escape di Altiplano 11 di juli di 2015.
Despues cu Guzman a wordo aresta atrobe na Mexico na januari 2016 , ta acusa Coronel Aispuro di involucra su mes den planificacion di otro huida prome cu extradicion di Guzman pa Merca na januari 2017.
Guzman Loera a wordo condena pa un hurado di Districto East di New York na 2019 pa su papel como lider di e Cartel de Sinaloa.
Coronel Aispuro ta acusa di un denuncia penal di conspiracion pa distribui heroina, cocaina, marihuana y metanfetamina di manera ilegal pa Merca.
Secretario di Husticia Auxiliar Interino Nicholas L. MacQuaid di Division Penal di Departamento di Husticia y Subdirector di Cargo Steven D’Antuono di Oficina di Campo na Washintong di FBI a haci e anuncia di e aresto.
Te awor, Oficina di Campo na Washintong di FBI ta investiga e caso, den tanto subdirector interino Anthony Nardozzi y abogado Kate Wagner di Seccion di Estupefaciente y Droga Peligroso di Departamento di Husticia ta procesa e caso.
