Presidente Mexicano a bisa ayera cu lo pusha fiscal general di e pais y e conseho hudicial pa un investigacion completo riba oficialnan acusa di conduci un investigacion tocante e desaparicion di 43 studiante na 2014. E investigacion a wordo haci asina malo, cu e sospechosonan principal ta laga den libertad.
E anuncio di Presidente Andres Manuel Lopez Obrador a yega despues di e liberacion di Gildardo Lopez Astudillo den weekend, cual a pone un precedente cu expertonan ta bisa por conduci na liberacion di 50 mas sospechoso den un caso cu a bira simbolo di crisis di derechonan humano na Mexico.
E liberacion por ta ademas di 53 di e 142 sospechoso original libera caba, segun vice Minister di Interior, Alejandro Encinas. El a culpa e autoridadnan di fabrica evidencia, uza tortura, y generalmente cubri of destrui un caso den cual tabatin evidencia real pa enhuicia e responsabelnan.
Autoridadnan ta bisa cu Polis a secuestra e studiantenan di e scol Ayotzniapa na Iguala, estado Guerrero, y a entrega nan na e gang di droga Guerreros Unidos. Lopez Astudillo supuestamente tabata lider di e gang na Iguala.
Jesus Murillo Karam, Fiscal General bou Presidente Enrique Peña Nieto, famosamente a anuncia e ‘berdad historico’ tocante e desaparicion di e studiantenan. El a bisa cu e studiantenan a ser asesina y nan curpa kima den un bari sushi. Pero expertonan independiente a bisa cu no tabatin evidencia pa sostene e conclusion ey.
“E mal- yama ‘berdad historico’ tabata forma cu un fundeshi di encubrimiento, fabricacion di evidencia, y tortura na beneficio di e culpabelnan y contra e derechonan di e victimanan”, Encinas a bisa. “E ‘berdad historico’ ta contra realidad.”
Encinas a aclara cu mester inclui Murillo Karam y otro halto oficialnan den e caso den e investigacion.
