Presidente di Mexico, Andrés Manuel López Obrador, a sigura cu tin ‘permanente cooperacion’ cu su homologo Mericano, Donald Trump cu diferente asunto, como e lucha contra narcotrafico.

“Tin permanente cooperacion cu Gobierno di Merca, un bon relacion cune y cu presidente Trump”, e mandatario a bisa den un conferencia di prensa ora el a ser cuestiona riba e anuncio di e Ehecutivo Mericano di ‘duplica’ e lucha contra e narcotrafico na Latino America.

Lopez Obrador, di e partido di iskierda Movemento Regeneracion Nacional (Morena), a bisa cu e trabou coordina entre Mexico y Merca ‘ta yuda hopi pa resolve problemanan’.

El a recorda cu e mesun Trump ‘semper ta bisa y te reconoce’ cu ambos gobierno ta coopera, y a aplaudi tambe e ‘actitud respetuoso’ di embahador Mericano na Mexico, Christopher Landau.

Trump diaranson ultimo a ordena ‘duplica’ e cantidad di barco militar y soldadnan den e costa di Latino America pa lucha contra e trafico di droga na oriente di ocean Pacifico y Caribe, loke ta inclui Venezuela y Mexico.

E obhetivo di e operacion aki lo bay ta e cartelnan Mexicano y e cercano circulo cu presidente Venezolano, Nicolas Maduro na cual e husticia di Merca a presenta cargo siman pasa pa narcotrafico y tambe a ofrece un recompensa di 15 miyon dollar pa cualkier informacion cu por conduci na su captura.

Lopez Obrador a causa polemica fin di siman ultimo pa cuminda e mama di narcotraficante Joaquin ‘El Chapo’ Guzman, Maria Consuelo Loera durante un gira na Sinaloa.

E mandatario a sigura cu Maria Consuelo Loera ta merece ‘respet’ independientemente di ken ta su yiu.