(infobae) – Autoridadnan Mericano ya no ta bay pidi pena di morto pa Joaquin Guzman Lopez, yiu di Joaquin ‘El Chapo’ Guzman, kende ta enfrenta cargo na e pais bisiña pa actividadnan di narcotrafico.

Mediante un escrito presenta pa abogado Andrew S. Boutros, a bira conoci cu den caso cu Joaquin Guzman Lopez keda condena pa e cargonan cu tin den Corte Federal di Districto Nort di Illinois, e no lo ricibi castigo di morto.

“Segun Titulo 18 di Codigo di Merca, Seccion 3593, ta notifica e acusado Joaquin Guzman Lopez cu si e keda declara culpable, gobierno no ta bay solicita pena di morto,” ta skirbi den un documento dirigi na hues Sharon Johnson Coleman dia 23 di mei y comparti diamars pa periodista Keegan Hamilton.

E acusacion contra Guzman Lopez na Chicago ta registra den dossier digital cu folio 1:09-cr-00383. Den esaki tambe ta inclui otro tres yiu di El Chapo: Ovidio, Ivan, Archivaldo y Jesus Alfredo Guzman, conoci pa ta cabes di e fraccion di Cartel di Sinaloa conoci como Los Chapitos.

Den Corte Federal di Districto Nort di Illinois, Joaquin Guzman ta señala como un coordinador logistico cu tabata encarga di trafica cargamento di cocaina, heroina, metanfetamina y marihuana for di Mexico pa Merca. E tambe ta acusa di participa den actonan di labamento di placa.

E detencion di e yiu di El Chapo a tuma lugar dia 25 di juli di aña pasa, despues cu el a aterisa den aeropuerto di Santa Teresa, New Mexico, hunto cu Ismael ‘El Mayo’ Zambada, co-fundador di e Cartel di Sinaloa.

Embahador di Merca na Mexico e tempo aya, Ken Salazar, a informa cu Joaquin Guzman “a entrega su mes” di manera boluntario na autoridadnan, mientras cu El Mayo a ser hiba contra su boluntad.

Ta presumi cu e capo Sinaloense a keda secuestra na Sinaloa pa e yiunan di El Chapo Guzman, cu meta pa hib’e otro banda di frontera pa e keda deteni.

Di manera extraoficial a keda informa cu e yiu di El Chapo ta den negociacionnan cu autoridadnan Mericano pa yega na un acuerdo di culpabilidad. Esaki cu intencion di converti den un colaborador activo. Mescos cu su ruman, Ovidio Guzman.

Ademas di e caso na Chicago, e rumannan Guzman Lopez tambe ta enfrenta acusacionnan den Districto di Columbia pa un cargo relaciona cu actividadnan vincula na conspiracion pa distribui mas di cinco kilogram di cocaina, mil di marihuana y 500 gram di metanfetamina.

For di october aña pasa, ambos suheto ya no ta bao custodia di Bureau Federal di Prison (BOP). Prome cu esey, e yiunan di El Chapo tabata den Centro Coreccional Metropolitano (MCC) di Chicago. Maske nan paradero ta desconoci, esaki no ta nifica cu nan ta liber, pasobra nan por ta den custodia di otro entidad encarga.