Gobierno Federal ta investiga ex-presidente Enrique Peña Nieto, asina a revela un funcionario hudicial pa e corant Mericano The Wall Street Journal.
Di acuerdo cu e corant, agentenan ta investiga e ex-mandatario como parti di e caso di corupcion di perfil mas halto den e pais durante añanan, esun di Emilio Lozoya, ken ser deteni siman pasa na Spaña.
E corant a reporta cu e funcionario a sugeri cu e soborno cu presuntamente Lozoya, ex-director di Pemex a ricibi, a alcansa Peña Nieto.
Segun informacion di investigadonan di gobierno Mexicano, cu ta cita e testimonio di 2016 di ehecutivonan di Odebrecht, entre otro prueba, e empresa Brasilero a paga 9 miyon dollar na Lozoya pa sigura contractnan cu Pemex, tempo cu e tabata dirigi e campaña presidencial di Peña Nieto na 2012 y despues tempo cu e tabata director di e compania petrolero.
Ademas, e fuente a bisa WSJ cu Altos Hornos a paga pa Lozoya 3 miyon y mey dollar pa sigura e benta cu sobreprijs pa Pemex di e planta di fertilisante Agronitrogenados.
“E oficina di fiscal general (FGR) tin evidencia cu e corupcion di Lozoya na Agronitrogenados y Odebrecht ta yega na un nivel mas halto”, e funcionario a bisa y a referi na e ex-mandatario.
“Si Peña Nieto lo ser procesa, lo ta e prome biaha cu un presidente Mexicano moderno ta enfrenta cargo di corupcion den e tribunal”, e articulo publica pa Juan Montes y Jose de Cordoba ta bisa, coresponsal na Mexico di e diario di New York.
Sinembargo, ta adverti cu e cargo no ta probabel den corto plaso, ya cu e extradicion di Lozoya lo por dura varios luna, segun expertonan a sigura.
