(EFE) – Comision Mexicano di Ayudo pa Refugiado (Comar) ayera diaranson a reactiva e tramitenan di asilo na frontera sur despues di varios dia di protesta di cerca di 5.000 migrante cu ta busca haya nan documentonan.
Autoridadnan a ordena migrantenan pa pais di origen, nan a coloca riot police y borchinan cerca oficina di e sede di Comar na Tapachula, frontera di Mexico cu Guatemala.
Den nan mayoria, e migrantenan cu a drenta ta di Sur America, Centro America y Africa.
Dianan anterior, Comar a suspende e tramitenan pa solicita asilo memey di protestanan di migrantenan, cu a denuncia e falta di orden y atencion di Gobierno Mexicano.
Autoridadnan a permiti entrada di grupo di 20 persona y e mesun dia nan a entrega un pre-afspraak pa september.
Sinembargo, miles di migrante Haitiano ta permanece den espera di atencion bao e rayonan fuerte di solo, sin awa, sin cuminda, sin servicionan basico y den espera di por resolve nan tramite.
Den e luga tin cerca di 2.000 migrante Haitiano, incluyendo mucha, hoben y adulto cu ta permanece para den e rij, ya cu autoridadnan a duna un beurt pa nan por drenta.
E hecho aki ta refleha e fluho migratorio record pa Merca, unda Oficina di Aduana y Proteccion Fronteriso (CBP, na Ingles) a detene na aña fiscal 2022 un cantidad record di mas di 2.76 miyon di persona sin documentonan legal.
Ademas, durante 2022, segun datonan di Comar, Mexico a ricibi 118.478 peticion di migrante cu ta solicita asilo, e di dos cifra mas halto despues di 2021 cu 131.448 caso.
