(AP) – Companianan di tecnologia di tur tamaño ta demostrando nan productonan mas actual na CES, anteriormente conoci como Consumer Electronics Show.

E show lo bolbe back normalidad despues di a ser organisa di manera completamente virtual den aña 2021 y mirando un disminucion significante den personanan presente den aña 2022 causa pa e pandemia. Exhibicionnan ta di un gran variedad di nombernan grandi manera Sony y LG na companianan nobo y chikito. Bo por mira e siguiente producto cu lo bira un gran hit of algo cu nunca lo desaroya mas leu cu e etapa di prototipo.

Riba diamars anochi, e programa a cuminsa cu un bista di algun di e 3,000 companianan cu a inscribi pa participa. CES ta habri oficialmente diahuebs.

Pokemon, pero pa paharito
 Bird Buddy a demostra un dispositivo den forma di un cas pa paharito cu ta duna nan cuminda pero tambe ta saca un potret di nan na momento cu nan para pa come algo. E compania ta bisa cu e tecnologia di Inteligencia Artificial por reconoce mas di 1,000 especie di paharito, permitiendo e usuarionan comparti e imagennan via un aplicacion di telefon ki tipo di paharito nan ta duna cuminda.

“Nos ta purba di crea un sorto di wega di e coleccion y converti esaki den algo divertido cu bo por haci, casi manera un Pokemon Go cu bestianan di berdad y un mundo di bestia den bo mesun patio,” Kyle Buzzard a splica.

E producto ya caba a yama atencion di algun di e consumidornan cu kier demostra e mundo ki paharito nan ta mira bishita nan cas.

Skates electrico

Reporteronan a experiencia un momento divertido ora cu nan a core rond di e salanan di exhibicion riba ‘skates’ cu tabata controla cu remote. E skatenan electirco aki ta di compania Frances AtmosGear.

E bateria ta dura 32 kilometer segun e fundador Mohamed Soliman, ken ta spera cu hendenan lo mira esaki como un forma pa transporta nan mes manera baisnan electrico of scooternan. “Mi meta ta pa tur hende por skate atrobe pa motibo cu esaki ta asina divertido pa haci, tur biaha cu bo mira un hende skate bo ta mira un sonrisa grandi riba nan cara,” Soliman a declara.

Tattoo temporario digital

Un dispositivo cu bo ta wanta den bo man di compania Sur Koreano PRinker ta permiti bo persona rapidamente y facilmente aplica un tattoo temporario.

E dispositivo ta usa inc di grado cosmetico cu un libreria di miles di diseño of e opcion pa crea bo mesun diseño cu e compania su aplicacion. Despues di scoge un tattoo, bo ta pasa e dispositivo riba e parti cu bo kier aplica e tattoo. E tattoonan ta a prueba di awa pero por ser kita cu habon.

E modelo actual tin e balor di 279 dollar y e modelo mas chikito ta di 220 dollar. E cantidad di ink ta suficiente pa 1,000 tattoo y ta costa 119 dollar.

Ayudo pa sa unda bo ta bay

Compania Hapones Loovic a crea un dispositivo cu ta diseña pa resolve e desafio di e personanan cu tin dificultad cu navegacion ora cu nan ta cana.

E dispositivo aki cu bo ta usa rond di bo neck ta emiti zonidonan y vibracionnan pa guia e usuarionan na cierto destinonan, permitiendo nan wak loke ta rond di nan na luga di enfoca riba un telefon su aplicacion di mapa.

Loovic su co-fundador y CEO Toru Yamanaka a bisa cu el a ser inspira pa crea e dispositivo ora cu su yiu homber, ken tin un deshabilidad cognitivo, no por a navega bon ora cu e ta cana.

E prototipo te ainda no ta disponibel pa e publico.