Manera Fundacion Mi Voz ta Bo Voz a informa siman pasa, nan a firma un acuerdo cu Fundacion Bos di Hubentud di Corsou pa traha riba e parti di prevencion di abuso sexual di mucha na Aruba. Esaki a cuminsa e dia di ayera pa studiantenan mucha muhe di Maria College.

Lisette Gomes a sigura cu nan ta asina contento cu pa hopi aña cu nan tin cu e lucha aki cu ta afecta e muchanan, “awe nos ta bay dal un paso sumamente grandi, cu nos ta bay cuminsa un proyecto cu ta bay siña nos muchanan, mucha muhe principalmente, con pa defende y cuida nan mes riba e tematica aki di abuso sexual, acoso sexual of rape.”

E training dirigi na aproximadamente150 mucha muhe tin un tempo estableci di tres dia, na unda nan no ta espera cu ta algo cu lo dura tres dia so, sino cu mester ta algo duradero. Ademas di e proyecto aki, esnan envolvi den fundacion tambe ta hayando un otro training pa por drenta cu e parti di prevencion pa muchanan den kleuterschool.

“Plan nos tin hopi. Nos kier yega na edadnan di mas jong posibel, y pa cu esaki nos lo bay tene e comunidad actualisa riba e tema aki. Pasobra nos ta scucha di proyectonan pa muchanan di klasnan mas grandi y nos a mira recientemente un caso di un baby di 8 luna cu a wordo abusa sexualmente. Esey a causa un shock hopi grandi, p’esey nos mester cuminsa lo mas pronto posibel,” Gomes a sigura.

Di su parti, Anne-Sheila Alberto di Bos di Hubentud a señala cu pa basta tempo e topico di abuso sexual tabata un taboo y cu transcurso di tempo ademas di e yegada di social media, por mira cuanto situacion a bin dilanti internacionalmente loke ta nifica cu no ta un problema di e islanan aki so, e ta algo mundial caminda e taboo ey a wordo kibra caminda mas y mas hende ta sali bin dilanti.

El a bisa cu na Corsou pa papia di abuso tabata algo hopi limita, awendia nan ta registra tres caso den e ultimo tempo aki unda e agresor a haya entre 9 pa 10 aña di castigo lo cual a subi manera el a sigura, pero e parti mas importante cu e ta considera ta “pa e mucha no bira victima, conscientisacion ta hopi importante, traha mas den prevencion y esey nos ta haci na tur scol na Corsou.”

Den e 30 aña cu e fundacion aki tin, Alberto a comenta cu nan tin un relacion di mas di 13 aña cu Lisette Gomes prome cu el a lanta e dos fundacion y nan ta gradici pa esey aunke esaki no ta e unico fundacion cu e cual nan tin un relacion na Aruba, esaki ta pa contribui na loke nan ta bin haciendo pa hopi tempo caba na Corsou.

“Nos ta hopi activo den loke nos ta haci, nos ta drenta den scolnan di Corsou casi tur dia cu nos material cu e parti di Love And Protect Yourself pa e cual nos tin un team completo, tanto hende homber como hende muhe cu awe ta bay drenta na Maria College pa asina siña e muchanan self defense y tambe di e empodera nan mes,” Alberto a sigura.

E mesun proyecto aki dirigi na mucha muhe, tambe ta wordo dirigi na muchanan homber y tin e nomber di “Building Boys Empathy” na unda nan ta yuda e muchanan homber pa crea empatia pero tambe pa e stima y respeta su mes mas tanto “pasobra nos ta mira cu durante añanan semper ta enfoca pa hopi biaha riba mucha muhe y hende muhe, pero hende homber tambe a bira victima di tur tipo abuso, esey ta nifica cu nos mester cuida nos mucha muhe y mucha homber, nan ta chikito, vulnerabel y a nos como adulto mester ta e cusinchi pa cuida y preveni e abuso,” Alberto a expresa.

Di loke ta trata e training cu a cuminsa ayera, Alberto a sigura cu nan ta bay educa un grupo y con ta reconoce abuso, kico por haci na e ora di reconoce, algo cu nan a cuminsa haci for di basta tempo prome cu nan a bira un fundacion, nan tabata duna les di self defense na muchanan cu a bira victima di abuso sexual of tabata victima potencial.

“E proyecto Love and Protect Yourself ta bay mas deep den e training pasobra nan ta haya les di teoria, empoderanan mes door di siña di nan curpa, con esey ta hinca den otro, kico e agresornan ta pensa y kico nan ta haci normalmente, tambe tin e parti practico unda ta siña e tecnica di karate, kickboxing, jiujitsu, unda nan lo siña defensa di chocamento, defensa ora tin un cuchiu of un pistol y tur esey nan ta bay siña pa nan mes por ehecuta e tecnica, pero tambe estado mental cu mester ta aden pa por ehecuta e tecnica, pasobra bo por sa cantidad di tecnica pero si bo no ta prepara mentalmente no por haci e tecnica nunca,” sensei Raul de Windt Instructor a señala.

 

LEAVE A REPLY

Please enter your comment!
Please enter your name here