(CNET) – Microsoft riba diamars a revela un version nobo di su sitio web di buskeda online Bing cu ta incorpora e tecnologia tras di ChatGPT, un sistema di inteligencia artificial pa contestanan creativo y di combersacion cu ta marca e prome chens grandi den añanan largo di por adelanta e rey den sitionan web similar Google.
Big awo ta un “co-piloto podera pa inteligencia artificial,” e gigante den tecnologia a declara, treciendo resultadonan combina cu informacion di e modelo grandi di lenguahe for di Microsoft su partner OpenAI. Bing tambe a ricibi un bentana di chat nobo cu Microsoft a bisa lo yuda crea listanan di compra y conseho, conseho di biahe y weganan. E tecnologia tambe a ser incorpora dentro di Microsoft su browser Edge, unda cu e por ehecuta tareanan manera crea un resumen di cierto PDF y genera publicacionnan pa LinkedIn.
“Tur interaccion cu computer lo ser media cu un agente yudando,” hefe ehecutivo Satya Nadella a bisa na un evento di lansamento den e compania su base di operacion na Redmond, Washington. “Nos lo tin e nocion aki di co-piloto cu lo ta presente den henter e aplicacion.”
Ya por haci uso di un version pa test di e tecnologia nobo aki cu un cantidad limita di peticion prepara pa Microsoft na bing.com/new unda cu por inscribi pa por ricibi un lansamento mas amplio. Den simannan binidero, Microsoft tin plan di ofrece esaki na miyones di persona ademas di agrega un version pa dispositivonan manera smartphone.
E tecnologia ta un avance grandi pa e desaroyo di e negoshi aki di buskedanan online, cual no a cambia hopi den e añanan recien. Google a traha pa incorpora mas contesta den su resultadonan, sinembargo esaki no ta compara cu e tecnologia nobo cu inteligencia artificial por ofrece. Tecnologia di chat basa riba modelonan grandi di lenguahe por ofrece contestanan y informacionnan hopi mas compleho y amplio.
