Ayera mainta, miembronan di Sint Aloysius School a trece dilanti un situacion cu ta mantene nan den preocupacion pa loke ta trata nan edificio na Noord, y tambe e edificio cu nan ta ocupando na e momentonan aki.

Vladimir de Cuba, cabesante di e scol, a trece dilanti cu dianan pasa a sali den un noticiero un informacion tocante Sint Aloysius School, cu segun na luna di october di e aña aki nan lo mester bandona e edificio di VAD cu ta ubica na L.G Smith Baolevard y bay back na nan edificio bieu ubica na districto di Noord

Tocante esaki, de Cuba a expresa cu den e noticiero a wordo papia di un facelift chikito prome cu nan drenta den edificio na Noord, el a menciona cu el a drenta den contacto cu directiva di Skoa y ta berdad segun el a sigura cu Skoa a ricibi un notificacion tocante esaki “pero ainda e proceso pa confirma esaki y wak ki ta e otro posibel solucion ta andando y no ta asina cu ta full determina cu nos scol mester bandona VAD y bay back na edificio na Noord” de Cuba a splica.

Di mesun manera, el a manifesta cu e ta lamenta loke e noticiero a trece dilanti haciendo mal uso di nan informacion pa motibo cu nan mes cu ta di scol no tabata sa mes di e carta ey, loke ta trece confusion pa mayornan cu a mustra preocupa despues cu nan a scucha y noticiero.

“No ta prome biaha cu nan ta mete cu Sint Aloysius School of mi persona, pero mi mester bis’e cu ta basta, bo ta baha e calidad di otro noticiero y reporteronan na Aruba, loke bo ta haci no ta noticia, esey ta redashi” de Cuba a referi na e medio di comunicacion.

Sint Aloysius School su edificio na Noord tin casi tres aña bandona, manera el a expresa, durante e tres aña aki a bira pio pa via di hende cu ta vandalisa e luga, pa loke el a enfatisa cu “si bo kier papia di un facelift chikito mes, bo no por ta pensando realistico” de Cuba a dirigi esaki na e minister demisionario encarga den area di Enseñansa Armando Rudy Lampe.

“Bo no por bay duna nos personal, nos muchanan y nos mayornan di Noord un bofta asina den nos cara, di gaña y bisa di tira un tiki verf y drecha un par di porta y manda nos back eyden, si ta asina nan kier manda nos, e lo ta un accion inhumano y a mi lo entrega keho na unda cu ta pa evita esaki”, de Cuba a manifesta.

Asina mes, el a sigura cu scol aki nunca tabatin airco y tabatin temporada cu e calor den e klasnan tabata insoportabel pa e muchanan y personal, loke no ta nada agradabel pa duna les den ambiente ey pa motibo cu alumnonan mester siña na un manera optimal y muchanan por ta mas trankil.

“Mi ta pidi encarecidamente na minister encarga pa recapacita riba e accion cu e kier tuma akinan, pasobra e lo ta inhusto y inhumano pa saca nos y pone nos den un estado cu no por ta optimal pa nos muchanan por siña” de Cuba a expresa.

Ademas, el a menciona cu den pasado minister demisionario di Enseñansa a vocifera cu el a yega di ofrece Sint Aloysius School un edificio hopi mas miho pa nan bay aden pa motibo cu VAD supuestamente no ta un edificio optimo of ideal pa scol ta aden pero “laga mi rectifica esaki, ningun biaha minister a acerca mi y ofrece mi ningun edificio di miho calidad pa nos por bay aden, lo cual el a ofrece mi tabata ta pa nos bay back den un parti di hala di banda pazuid di Sint Aloysius School y un parti nos ta bay usa scol di Sint Anna den parti merdia”, el a declara.

Di esaki, el puntra con esey lo por ta posibel pa motibo cu Sint Anna School tin un cantidad grandi di alumno tambe y nan tambe tin derecho di haci uso di nan edificio merdia, e maestronan tambe tin cu planifica nan les y prepara pa e siguiente dia, “e idea aki no ta realistico”, de Cuba a bisa.

El a informa cu na 2019 nan a haya un presentacion di un arkitecto cu a pinta e mapa di un posibel edificio nobo pa Sint Aloysius School, un edificio cu tabata full modular y ora cu nan e haya e presentacion segun loke de Cuba a menciona e tabata parce un mall, algo cu no tabata realistico.

Asina mes, el a sigui conta cu na 2018 tabatin e palabracion pa nan bandona edificio y DOW tabatin tres mapa pinta y nan tabatin otro dos opcion mas pa un edificio parcialmente renoba y un parti nobo, pa motibo cu e hala pa nort di edificio no ta renovabel, den un par di aña tur e scheur ey ta bin back.

Actualmente e murayanan di edificio parti pa nort tin scheur di 40 centimeter di hancho, e ring balk di e dak ta scheur di punta pabao te punta pariba segun loke de Cuba a informa.

Ta p’esey tambe e ta pidi pa prome minister demisionario Evelyn Wever-Croes pa papia cu minister di Enseñansa y reevalua e situacion aki di Sint Aloysius School pa motibo cu e situacion ta serio.

“Nos mayornan, nos alumnonan y nos coleganan ta hende hopi pasivo y cooperativo te di mas, pero si mi mester lanta e mayornan di Noord for di soño pa nos sacudi un poco, nos ta sacudi un poco stof”, de Cuba a comenta.

De Cuba a puntra tocante kico a pasa cu e supuesto suma cu tabatin den presupuesto pa drecha Sint Aloysius School, cu segun el a compronde tabatin 3 miyon florin presupuesta pero e no a haya confirmacion di esey.

Di su parti, Skoa a haci un publicacion riba nan Facebook page na unda nan a informa cu “En berdad, ‘fondo disponibel’ menciona eynan no ta pa renoba boso scol pero pa basha e abao. Nos nengamento di laga sloop e Noordvleugel y reemplasa cu containernan, ta resulta awor den un decision cu “alleen een oppervlakkige facelift” lo wordo duna”.

Den februari 2019 caba SKOA a laga traha un onderhoudsrapport pa e scol cu ta reconoce su estado bastante bon y su balor spiritual catolico y cultural historico. Nan a bisa cu nan lo publica esaki tambe. Lastimamente esey ta cay ariba ‘deaf ears’ cu instancianan y mandatarionan cu ta insisti ariba reemplasa herencia di enseñansa catolico cu modularnan.

En berdad, na Colegio San Hose e edificio unda libertador defunto Betico Croes y tambe ex-minister di enseñansa defunto Frido Croes a duna les, a wordo basha abao. Skoa a señala cu “no por a preveni pero a exigi pa pone un dak y un gallerij pa mantene un bista di un scol y pa duna sombra na muchanan. Alabes, no solamente scolnan di SKOA a wordo neglisha pa añanan, pero por mira edificionan monumental di Juliana y Beatrix school na boulevard, cu tambe ta deteriorando, mientrastanto miyones ta wordo gasta pa alumnonan haya les den edificionan comercial”.

“Contribucion di Iglesia Catolico y di SKOA na enseñansa di Aruba ta inmensamente grandi. Tin acuerdo historico cu nan edificionan por wordo usa como scol, sin cu Land Aruba mester paga huur cu locual ley ta bisa (mescos ta wordo paga por ehempel pa huur di VAD gebaow). A cambio Land Aruba mester mantene pa locual ta groot onderhoud. Lastimamente tin scolnan manera St. Aloysius School caminda cu e acuerdo no a wordo cumpli cune. Esaki mester wordo coregi debidamente, no door di bash’e abao pero door di renob’e of reconstruie. Esaki sigur door cu St Aloysius School ta forma parti, mescos cu misa Santa Anna, St. Anna school y Imeldahof, di un area historico y turistico den curason di e districto di Noord”.

“No perde speransa, renobacion of reconstruccion ta pa nos un prioridad. Laga nos spera pa un cambio pa miho den añanan nos dilanti”, Skoa a finalisa.

 

 

LEAVE A REPLY

Please enter your comment!
Please enter your name here