AƱa 2020 den sentido demografico a resulta den algun fenomeno cu no ta asina yamativo riba nan mes, pero cu ta importante pa tene na cuenta. Tendencia manera mas hende di edad y menos nacemento, loke ta disminui e base cu den futuro ta traha pa paga (pension) pa esnan di edad.

Tambe mas y mas persona naci na Aruba cu ta emigra y menos cu ta bolbe, loke ta implica cu aƱa tras aƱa e poblacion conoce un cambio den su composicion, cu cada vez ta consisti mas di persona naci pafor di Aruba. Tur cifra den e articulo aki ta di CBS Aruba.

Migracion

Manera tabata di anticipa, por a mira menos inmigracion na 2020, compara cu e aƱanan anterior, producto di e pandemia cu a paraliza nos economia. Mientras na 2019 ainda a drenta 1.424 persona di otro nacionalidad, na 2020 esey tabata solamente 630 persona. Di otro banda, tabatin un salida di Aruba un poco mas fuerte, unda 530 persona di otro nacionalidad a bandona Aruba, mientras cu na 2019 a sali 479. En total a sali di Aruba na 2020 3.113 persona, di cual e gran mayoria tabata di nacionalidad Hulandes; solamente 20% tabata di otro nacionalidad.

Tuma na cuenta cu den e cifranan presenta aki ta trata di persona di otro nacionalidad, legalmente na Aruba y registra oficialmente na Censo y cu despues eventualmente a sali di e registro. E no ta envolve persona no documenta cu a bandona e isla, eventualmente den acuerdo cu autoridadnan hudicial.

Di otro banda e salida di persona di nacionalidad Hulandes tabata mas fuerte cu e aƱanan anterior. A sali di Aruba 1589 persona Hulandes naci na Aruba of Antiyas, mientras cu 619 persona di e mesun categoria a bin establece na e isla. E cifra di salida di e categoria aki ta un poco mas halto cu e aƱanan anterior, 1406 persona na 2019, cu 685 persona cu a bin establece na Aruba. Esaki no ta cambia tanto na e imagen di varios aƱa caba, unda emigracion di hende naci na Aruba ta hopi mas fuerte cu e cantidad cu ta reestablece aki, mientras cu den e categoria di persona di otro nacionalidad nos ta mira lo contrario: mas persona di otro nacionalidad ta drenta anualmente, mientras relativamente poco ta bandona Aruba.

Nacemento ta sigui baha

Durante ultimo decada y mey por mira un tendencia constante di menos nacemento, cu a baha di mas di 1400 nacemento te na alrededor di mil nacemento den ultimo aƱanan. 2020 a marca un record nobo cu solamente 829 nacemento,, mientras cu 2018 y 2019 ainda tabata na resp. 1028 y 1029 nacemento. E tendencia aki ta keda refleha tambe den e cifranan di e poblacion en general, unda e poco nacementonan tin influencia fuerte den e categoria di 0-4 aƱa y 5-9 aƱa, visible den e tabel presenta aki. Cu e cambionan aki tin consecuencia numerico bastante rapido por mira ora compara e cifranan di 2017 cu 2020. Den tres aƱa di tempo, di fin di 2017 pa fin 2020, tin 1164 mucha menos den e categoria di 0-4 aƱa. Esaki tin entre otro consecuencia pa enseƱanza, unda den kleuteronderwijs y scol basico lo sinti e demanda reduci pa e tipo di enseƱanza aki.

Enbehecimeno tambe ta continua

For di e tabel 4 presenta aki por constata cu e poblacion riba 55 aƱa ta creciendo aƱa tras aƱa, cu resultado cu e grupo cu ta bin na remarca pa pension di behez tambe ta crece. Na 2017, cu un poblacion practicamente mes grandi cu na 2020 (111.083 na 2017 vs 111.050 na 2020), e grupo di 60 aƱa bay ariba tabata na 22.219, y na fin di 2020 tabata di 25.190 persona. E desaroyo aki no lo para por lo pronto; e poblacion di edad ta sigui crece te despues di 2030, y lo alcanza un total di mas di 30.000 persona. Un interogante ta keda con grandi e poblacion total lo ta pa e tempo ey, loke lo depende di tipo y ritmo di desaroyo economico.

LEAVE A REPLY

Please enter your comment!
Please enter your name here