(Infobae) – Peticion pa eleccion presidencial y liberacion di prisoneronan politico a mobilisa mas cu mil persona na Venezuela diasabra ultimo na Maracaibo, capital di estado Zulia y un ciudad na frontera cu Colombia. E manifestacion, lidera pa varios lider di oposicion, a marca un demonstracion publico nobo di rechaso contra gobierno Chavista actual lidera pa presidente interino Delcy Rodriguez.
Entre e voznan mas notorio tabata esun di Juan Pablo Guanipa, kende a bisa cu e estado a experimenta situacionnan asina dramatico cu “awe e ta lanta y ta hisa su voz” den busca di eleccion presidencial y “logra e cambio politico cu e pais ta aspira” despues di captura di ex-dictador Nicolas Maduro na man di Merca.
E yamada a reuni sostenedornan di diferente partido, identifica pa color di nan organisacion, kendenan a crusa varios caya exigiendo eleccion liber. Na e marcha tabatin presencia di ex-diputadonan manera Freddy Superlano, Biagio Pilieri y Andres Velasquez, e ultimo tambe ex-gobernador di estado Bolivar.
E mobilisacion a agrega regreso di Lester Toledo na Venezuela, kende a keda pafo di e pais durante un decada pa loke el a yama “exilio forsa”. Presencia di Toledo a ser ricibi como un simbolo di persistencia di oposicion contra e regimen lidera pa Maduro.
Den e marcha, un manifestante tabata bisti un mascara di cacalaca y un borchi cu “R.E.P.D. e revolucion”, den referencia directo na partido gobernante Chavista.
Guanipa a cuestiona Delcy Rodriguez, sosteniendo cu “e no ta legitimo ni ta representa ningun hende”, y a remarca: “No tin manera pa ningun problema ser soluciona mientras e sigui sinta unda e no mester ta.”
E proceso di negociacion proponi e siman aki pa mayoria opositor den Manifesto di Panama tambe a ocupa un lugar central den discursonan. Guanipa a anticipa cu “Merca lo ta involucra”, considerando cu presion internacional lo ta clave pa crea e condicionnan necesario pa organisa eleccion den cual, segun e, ganador di Premio Nobel di Paz y lider di oposicion Maria Corina Machado lo ta candidato.
Den palabranan di Guanipa: “Nos ta trahando pa Maria Corina bolbe mas pronto posibel y pa nos tin eleccion presidencial mas pronto posibel.”
E situacion politico na Venezuela ta pasando door di un etapa di incertidumbre, pasobra e cambio den presidencia interino y tension interno ta mantene acuerdo riba un yamada electoral den suspenso. Sectornan di oposicion ta kere cu solamente un transicion negocia, cu respaldo internacional, por desblokia e crisis institucional.
Ex-gobernador Andres Velasquez tabata categorico: sin Machado, “no tin transicion na Venezuela”. Ademas, el a expresa confiansa cu Merca lo ta “e garantisador di loke ta ser acorda” den negociacion. Diasabra, e mobilisacion na Maracaibo a laga cla cu exigencianan di oposicion pa eleccion liber y garantianan democratico ta keda den centro di e debate nacional.
Di otro banda, e manifestantenan a mustra borchi di apoyo pa e prisoneronan politico cu ainda ta den prison di teritorio Venezolano y cu no a ricibi e amnistia pa e ley promulga na februari pa e gobierno Chavista.
