Aruba ta sigui tuma pasonan pa dilanti den e reforma di cuido di salud y enseñansa durante e proximo periodo. Esaki a ser enfatisa den e Uitvoeringsagenda en Uitvoeringsrapportage Landspakket Aruba den cual Gobierno di Aruba y Hulanda ta informa tocante e progreso di e reformanan cu a ser acorda pa e periodo di 1 di april te cu 30 di september 2026.

E rapport ta mustra cu e enfoke ta move cada bes mas for di un fase di diseño di politica pa un fase di implementacion. Na mesun momento, varios proyecto ainda ta enfrentando reto relaciona cu planificacion, organisacion y capacidad di ehecucion.

Den e sector di salud, prioridad ta ser duna na mehoracion di calidad, accesibilidad y sostenibilidad financiero di cuido medico. Den sector di enseñansa, enfoke ta cay riba mehoracion di calidad di enseñansa, modernisacion di material educativo, miho apoyo pa alumno y renobacion di infrastructura escolar. Tur dos sector ta forma parti di e proceso mas amplio di reforma cu Aruba y Hulanda a cuminsa den 2020 den marco di e Landspakket.

Segun e rapport, e vision pa sector di salud ta enfoca riba un sistema di salud cu ta ofrece cuido di calidad halto, cu ta accesibel pa ciudadano y financieramente sostenible pa futuro. Un di e metanan principal ta logra miho coordinacion entre diferente proveedor di salud, cu mester resulta den cuido mas efectivo y gasto mas controlable.

Durante ultimo añanan varios resultado importante a ser logra caba. Entre nan ta e firma di un Acuerdo di Salud (Zorgakkoord), desaroyo di un modelo financiero pa proyeccion di gastonan medico, racionalisacion di tarifanan pa examen di laboratorio, implementacion di legislacion pa medicamento paketa y expansion di programanan di intervencion trempan pa obesidad. A desaroya tambe un sistema di contratacion pa cuido primario y a realisa un midimento inicial di e situacion di cuido pa diabetes.

Un di e tema mas importante den e rapport actual ta e fortalecemento di e Instituto di Calidad pa Salud. Segun e documento, e instituto ainda no tin suficiente capacidad institucional y ainda mester fortalece e garantia di su mandato. Pa e motibo ey, un economista di salud a ser contrata pa prepara, hunto cu sector medico, un rapport cu recomendacionnan pa sigui cu e desaroyo di e instituto.

Gobierno ta spera cu e rapport lo keda cla durante di dos kwartaal di 2026. Basa riba e recomendacionnan, un decision tocante e siguiente pasonan necesario pa fortalece e instituto lo ser tuma. Tambe lo tene cuenta cu sosten adicional for di TWO Hulanda pa facilita e proceso di desaroyo y pa garantisa continuidad di e Acuerdo di Salud firma den 2023.

Den e introduccion general di e rapport ta ser menciona cu diferente opcion ya caba a ser formula pa mehora structura y funcionamento di e instituto. E siguiente fase lo enfoca riba implementacion concreto di esakinan. Na mesun momento, lo traha tambe riba un renobacion di e Acuerdo di Salud pa garantisa cu cuido medico na Aruba lo keda di bon calidad y financieramente accesible.

Otro prioridad ta diabetes. Aruba ta considera diabetes como un di e desafionan mas grandi pa salud publico y pa sostenibilidad di sistema di salud. Pa motibo di ey, lo introduci un maneho multidisciplinario den cual diferente profesional di salud ta colabora mas estrechamente rond di e pashent.

Segun e rapport, e metodo nobo mester resulta den miho deteccion di pre-diabetes, menos complicacion relaciona cu diabetes y miho tratamento di problemanan manera heridanan diabetico. Riba termino largo, gobierno ta spera cu e maneho nobo lo reduci e necesidad pa tratamento costoso manera dialisis y otro forma di cuido intensivo.

E rapport ta enfatisa cu tin atencion tambe pa fortalecemento di personal medico. Aruba ta trahando riba ampliacion di e programa di formacion di dokter di cas. Door di haci esaki, a tuma un decision pa crea lugarnan adicional di training pa atende cu e scarsedad di dokternan di cas den futuro. Aunke e cantidad di lugarnan di training ta menos cu originalmente a anticipa, e trayectonan di training existente ta continua.

Simultaneamente, Aruba ta implementa un sistema nobo di contratacion pa cuido secundario. Un Memorandum of Understanding (MoU) entre proveedor di salud, institucionnan medico, AZV y Gobierno di Aruba ya a ser firma. Cu e acuerdo aki, e fundeshi pa implementacion gradual durante 2026 ya ta estableci.

Den sector di enseñansa, e rapport ta pinta un cuadro mixto. Mientras cu varios proyecto a enfrenta retraso durante e fase inicial, gobierno ta indica cu un revision profundo di e contenido y metodologia a resulta den mas claridad y direccion.

Segun e documento, e proyectonan principal awor a cuminsa oficialmente y tambe a lansa un trayecto di e programa di management pa mehora coordinacion y siguimento.

E vision pa enseñansa ta enfoca riba enseñansa di calidad cu ta duna tur ciudadano, di hoben te adulto, oportunidad pa desaroya talento, ambicion y potencial individual. Alabes, e reforma ta busca pa mehora conexion entre diferente nivel di enseñansa y e necesidadnan di mercado laboral local den futuro.

Den añanan anterior diferente paso preparatorio a ser realisa. Entre nan tin un evaluacion amplio di sistema educativo, implementacion di un marco pa profesionalisacion di docente, inventarisacion di edificionan escolar y desaroyo di indicadornan pa midi calidad di enseñansa.

Un componente importante di e reforma actual ta modernisacion di material educativo. Segun e rapport, Aruba a cuminsa cu desaroyo di material adicional na Papiamento y pa enseñansa di Hulandes como idioma stranhero. Gobierno ta spera cu e prome materialnan nobo lo ta disponibel den prome kwartaal di 2027.

Ademas,material di apoyo ta ser crea pa yuda scolnan alcansa e metanan educativo cu a ser formula. E iniciativa ta ricibi apoyo financiero di TWO Hulanda, cu a proporciona subsidio specificamente pa desaroyo di material educativo na Hulandes y Papiamento.

Infrastructura escolar tambe ta ocupa un lugar central den e agenda di reforma. Un midimento nacional ta ser conduci pa determina e estado fisico di edificionan escolar. Segun e rapport DOW a completa inspeccion di scolnan di enseñansa basico, mientras cu un contratista externo ta encarga cu e evaluacion di enseñansa secundario.

Basa riba e resultado di e midimentonan, un Plan di Accion pa renobacion y modernisacion di scolnan lo ser prepara. Gobierno ta considera e informacion aki esencial pa logra miho planificacion di mantenemento y uso mas eficiente di recursonan financiero.

Segun e rapport, e estudio tambe lo permiti identifica prioridadnan concreto pa inversion y reduci gastonan inespera den futuro.

Banda di infrastructura, lo traha tambe riba fortalecemento di apoyo pa alumno. E meta ta pa cada scol dispone di un structura di cuido y apoyo pa detecta y atende necesidadnan di alumno na un etapa trempan.

Actualmente ta trahando riba financiamento, organisacion y sistema di monitoreo di e structura nobo. E indicadornan pa evaluacion ya a ser defini, pero implementacion completo lo tuma lugar gradualmente durante e siguiente añanan escolar.

Digitalisacion ta forma otro pilar importante di reforma educativo. Aruba ta desaroya un sistema nacional di siguimento di alumno cu eventualmente lo conecta tur scol. Na mesun momento un sistema central di informacion educativo, conoci como “Bucket”, ta ser construi cual mester facilita coleccion, analisis y compartimento di dato relevante pa tumamento decision.

Un convenio entre diferente entidad educativo tocante uso di informacion ya a ser firma. Ademas, un contratista a haya encargo pa desaroya un Sistema di Maneho Educativo.

Den area di curiculum tambe tin progreso. E metanan educativo pa enseñansa profesional a ser actualisa y formalisa den un Dossier di Cualificacion Profesional nobo. Na mesun momento a cuminsa cu e actualisacion di metanan principal pa enseñansa basico.

Di e forma aki gobierno ta busca garantisa cu programa educativo ta conecta miho cu estudio superior y cu necesidadnan real di economia y mercado laboral di Aruba.

E rapport di ehecucion ta indica cu tanto den salud como den enseñansa, e siguiente periodo lo ta decisivo pa converti planificacion y diseño den resultado concreto.

Mientras cu hopi investigacion, analisis y preparacion ya a ser completa durante añanan anterior, e enfoke awor ta riba implementacion efectivo y entrega di resultado concreto pa comunidad.

Na mesun momento, e documento ta reconoce cu varios iniciativa ainda ta depende di decisionnan administrativo, financiamento adicional y desaroyo organisacional. E reto principal ta keda logra completa e reformanan dentro di e termino stipula y alabes garantisa cu nan por ser manteni structuralmente den futuro.