“E cantidad di koelbox pa e di dos fase di vacunacion na Aruba ta na caminda pa nos isla.” Esaki tabata palabranan di Minister Plenipotenciario Guillfred Besaril na momento cu e carga di e koelboxnan a yega awe diaranson 24 di februari na e loods di Carib Intertrans na Capelle aan de Ijssen pa wordo transporta pa Aruba. Tambe presente director di Carib Intertrans Vladimir Römer.

 

E koelboxnan di e marca Dometic ta for di Alemania y ta certifica pa GGD na Hulanda. Esaki despues cu un team di inspeccion a bin inspecta tur e materialnan cu tin di haber cu e programa di vacunacion. ‘Aruba ta den full e fase 1di vacunacion. Nos a haya mas o menos 12 mil vacuna y nos tin miles di personanan cu ya a registra. Mi ta mira e movecion y mi ta hopi contento cu hopi hende ta reacciona y ta bay tuma nan vacuna y asina aki berdaderamente nos por para bek riba nos pia. E ta un aña di reinventa nos mes, pero e ta cuminsa na e vacuna aki pa asina nos slow down e curve di e contagio di e virus aki.’

E mandatario a bisa cu Gobierno di Aruba hunto cu Gobierno di Reino kier mira cu tur e parti Caribense di Reino Hulandes keda vacuna completamente pa mas tarda juni di e aña aki. E material aki ta sumamente importante pa e fase dos cu lo bay inicia asina cu Aruba ta asina leu cu e prome grupo cu mester keda vacuna cu ta tur hende riba 60 aña di edad.

Minister Besaril: “E material aki lo yuda primeramente e vacuna di Pfizer keda friu conforme e minimo di 15 pa 20 grado bou cero pa asina salvaguardia e calidad di e vacuna y cu nos por drenta den e fase dos. Mi ta sumamente orguyoso hunto cu e staf y personal di Arubahuis cu a haci esaki posibel. Mi kier a gradici tambe Carib Intertrans cu a bay te Alemania na e compania cu ta traha e material aki pa trece nan Capelle aan de Ijssel pa haci e tramitenan pa nan bay awe mes Aruba. Asin’aki nos por sigui pa loke tur ta e rebuilding di e economia Arubano den e esfuersonan grandi cu nos como Gobierno pa asina nos sali di tur loke ta e pandemia aki di Covid 19,” segun declaracion di Minister Plenipotenciario Guillfred Besaril na salida di e carga di koelboxnan pa e di dos fase di vacunacion na Aruba.

E potretnan ta cortesia di Cas di Aruba.

LEAVE A REPLY

Please enter your comment!
Please enter your name here