Directora di Koningin Wilhelmina Fonds (KWF) Aruba, Lilly Prince a informa cu e fundacion ta confronta nan retonan economico pa atende cu nan gastonan.

E ta mir’e cu lo yega e momento cu e fundacion mester tin cla poni un banda 175 mil florin pa atende cu e ayudo cu nan ta brinda na e pashentnan di cancer cu ta bati nan porta.

Asistencia

Encuanto gasto di personal Sra. Prince a declara cu niun di e miembronan di e directiva ta wordo paga. Nan trabao ta totalmente boluntario. “Nos no ta haya nada. Pero nos tin cu corda cu nos tin un team cu ta traha cu nos cu ta enfermeronan y nan ta freelance,” el a bisa.

Si tin pashent e enfermera freelance ta haya trabao, y si no tin pashent logicamente nan no ta haya trabao. Pero e tin cu informa na comunidad cu ultimo añas, KWF tin alrededor di 18 pashent cu mester duna e asistencia na cas. Tin caso caminda e enfermera ta keda su so cu e pashent, ya cu e famia mester a sali pa cumpli cu cierto compromiso. Pero e rato ta pasa y nan mester wordo paga pa nan trabao. KWF mester cumpli cu e trahadonan aki pa nan por duna e servicio manera mester ta, segun presidente di e fundacion aki.

 

El a laga sa cu no ta solamente e yudansa custumbra cu nan ta duna e pashentnan di cancer. Pero un servicio cu tin su peso riba gasto di KWF ta e asistencia cu nan ta duna na cas. Pero tambe e tipo di asistencia aki ta mara na cierto material cu mester wordo usa, entre nan cama special cu mester pone pa un enfermo terminal di cancer.

Tur pashent cu ta haya asistencia na cas ta haya un cama cu su matras. Na momento cu no mester mas di e cama, e matras aki ta wordo benta afo. Tambe durante cierto periodo cu e mesun pashent ta usando e cama, e matras aki ta wordo cambia pa un nobo. Kiermen e otro pashent cu lo bay usa e cama special aki ta haya un matras nobo. Tur e cosnan aki ta costa placa.

Recientemente nan a confronta un gasto cu ta mengua nan fondo. Nan mester a busca cuater cama completamente full ekipa, y nan ta cama costoso. E fundacion ta aprecia cu e agencia ta duna e fundacion un prijs di consideracion, pero toch e ta keda un gasto cu ta cay pa e fundacion. “Ta p’esey nos ta pidi… e necesidad t’ey,” el a bisa.

Nan tin diferente gasto cu no necesariamente tin di haci cu e pashent di cancer. Un di nan ta e gasto di mantencion di nan sede. E edificio unda WKF ta funciona ta propiedad di e fundacion aki.

Sra. Prince ta contento cu nan tabatin e vision ey den añas 90 cu awe KWF tin su propio sede. Nan no tin cu paga huur pero si nan tin cu mantene nan edificio. Nan ta gastonan cu ta bin acerca di loke regularmente nan tin cu brinda den asistencia y ayudo na e pashentnan di cancer na Aruba.

 

LEAVE A REPLY

Please enter your comment!
Please enter your name here