Minister di Husticia, Andin Bikker a bisa cu e decision di lanta e instrumento di toque de queda (TDQ), no ta kita cu constantemente den seno di crisis team di Covid-19, nan responsabilidad ta keda pa evalua cada instrumento huridico cu nan tin disponibel pa garantisa e siguridad di nos pueblo y salubridad di nos pueblo. “No ta fastioso nos kier haci!” segun e mandatario

E ta haya cu e implementacion di e instrumentonan aki a haci cu awe, crisis team, departamentonan y instancianan cu ta traha den salubridad por bisa tabata exitoso pa contene e consecuencianan di e reto di e Covi-19, cu Bikker a cualifica como uno

‘sin precedente.’

El a bisa cu TDQ ta un di e instrumentonan cu constantemente nan ta bin aplica pa evita cu personanan lo por bay den contacto innecesario cu otro pa asina minimalisa cualkier contagio di e virus. Pero e mandatario a bini cu otro aspectonan relaciona cu orden publico, y cu e ta haya cu tin hendenan cu ta lubida nan.

Segun Bikker den historia di nos pais nunca nos a yega di confronta un situacion, caminda nos tin asina tanto persona sin trabao. Esaki ta crea un situacion sin precedente pa loke ta trata mantencion di orden publico.

Ademas di esey, nan por constata a base di e maneho cu nan a bin cune di retorno boluntario di cantidad di persona cu a keda na Aruba y nan status ta ilegal. Nan ta persona cu dificilmente por tin bista riba nan. Pues si eventualmente un di e personanan aki tin sintoma di e virus, y nan no ta meld na e instancianan competente, debi na nan situacion di ilegalidad, nan ta representa un riesgo pa salubridad publico. Den e caso aki e ta haya cu TDQ ta bira un instrumento efectivo. Si por ehempel nan ta mira un persona riba caya pa definicion, e ta bira un sospechoso.

Encuanto e argumento cu no tabatin hopi caso di criminalidad pa mantene e TDQ pa preveni acto contra ley. E mandatario a expresa cu pa motibo di TDQ, nan por constata cu no tabatin hopi caso di criminalidad. Awor den e proceso cualifica como e ‘normal nobo’ nan ta bay wak con e situacion aki lo sigui. Pero e no ta descarta cu e lo trece retonan grandi pa sigui mantene orden publico.

Otro aspecto cu TDQ a contribui tabata pa preveni e presencia di personanan cu ta drenta ilegal via boto. Danki den un trabao conhunto y cooperacion estrecho cu Cost Guard nan a logra contraresta e fenomeno aki. Mirando e situacion regional cu e pais bisiña di Venezuela ta pasando aden, nan no por exclui ainda cu tin personanan cu un situacion dificil cu a pesar di nos situacion laboral actual debi na e Covid-19, nan lo purba drenta nos isla.

E mandatario ta haya cu esaki ta nifica un riesgo tambe. Pasobra si e persona aki tin Coronavirus/Covid-19 y nos autoridad no ta descubrie na tempo den su intento pa drenta nos isla, e ta importa e virus. “E ta otro reto cu nos por tin.” Pero si nos tin TDQ y si autoridad ta mira un hende riba caya, e persona ey ta bira un sospechoso y nan por control’e di biaha, el a laga sa.