Den mi añanan den varios gobierno mi a lucha cu hopi lider sindical y nos a siña conoce otro miho y haya aprecio pa cada un nan trabao. Mi ta corda, IOWUA, UEA, SIWA, GABA, SEPPA y FTA y un par di otro sindicatonan mas cu ora Lago a cera con nos – mescos pa haya placa fia di Hulanda den 3 tranche – cu hopi dolor na nos curason nos mester a reduci salario di tur ambtenaar cu un sliding scale depende di bo salario di 7.75% – 8.5%. Y pa solamente 2 aña nos a introduci un impuesto di solidaridad di nada menos cu 8.2%.

Logicamente e tabata duro pa e lidernan sindical, manera Anselmo Pontilius, Gregorio Wolff y otronan. Nan a subi caya y a protesta, pero nan tabata sa cu sin e medidanan aki Hulanda lo no yuda cu e prestamo y mi a bisa nan cu ora situacion economico financiero mehora nos lo purba debolbe nan como ambtenaar e parti entrega. Nos a perde e eleccion di 22 november 1985, pero nos a bolbe na februari 1989 den coalicion. MEP a cumpli atrobe cu e sindicatonan y nos a debolbe tur ambtenaar locual nan a entrega.

Eliminacion di trato desigual.
Impuesto di solidaridad a desaparece y nos a negocia pa duna tur trahado di gobierno un “status igual” cu SEPPA y GABA, unda tabatin werksters, serveersters, arbeiders y ambtenaar y mi a bisa nan cu nos gobierno lo bay elimina  e discriminacion den trato desigual y nos a firma cu e sindicatonan pa haci tur ambtenaar pa nan por a bira miembro di Fondo di pensioen APFA, haya periodiek, por bay ambtenarenrechter etc. Cu esaki mas cu 1000 empleado tabatin e oportunidad pa haya placa fia. Despues nos a negocia pa kita e desigualdad, unda un señora, tambe un homber soltero y muhe soltera cu ta traha den gobierno tabata ser paga 20% menos cu esnan casa. Nos a bisa pa “equal work” mester tin “equal pay”. Esaki a conta pa esnan den enseñansa y fundacionnan, empresanan di gobierno. Esaki tabata danki na gobierno di MEP y e lidernan sindical responsabel.

Welga ilegal na 2008.
Despues nos a regla cu mamanan soltera cu yiu tambe ta haya kinder toelage pa nan yiunan. Mas despues nos a introduci gelijk bedrag, bashi uitkering, e placa di vacacion a ser haci un luna  completo di placa y compensacion pa costo di bida na 2008 di 105 florin pa luna. A welga ilegalmente durante 6 siman largo pa perhudica nos pais y pa despues firma toch locual mi a duna e prome dia caba! Welga pakico anto? Alabes no por lubida cu nos gobierno a percura pa mamanan embarasa haya verlof 6 siman prome y 6 siman despues cu nan a duna luz y haya oportunidad pa cria nan baby cu lechi materno den oranan di trabao. Plus miembronan di sindicatonan di gobierno tabata haya ‘ter beschikking’ pa por a cobra sin traha pa haci “trabaonan” sindical! Asina tabata tin hopi cos mas cu a ser regla apesar di tin ora tabata lucha cu otro.

Mi aprecio pa e lidernan sindical di e tempo ey cu tabata bringa cu nos masha fuerte, pero consciente cu nan mester yuda si pa nos por a sali afo. Nos hasta a bira un sorto di amigo cu no tabata odia otro, pero discuti hopi fuerte. Awendia nos tin lidernan sindical cu no por  guia ni nan miembronan corda pa ser responsabel. Berdad tum’e con cu bo kier, pero falta formacion sindical y preparacion educativo di kico ta bo trabao y segun mi e actitud intransigente aki  cu mucho tinte politico lo mata sindicalismo. Ser miembro di sindicato pakico? Join e partido abiertamente di biaha anto!

 

LEAVE A REPLY

Please enter your comment!
Please enter your name here