Diaranson atardi Minister di Turismo a reuni cu e gerencia di Aruba Ports Authority den cual APA a duna e mandatario un presentacion. Pa prome biaha den historia di e compania, APA a presenta un Masterplan cu a keda desaroya conforme e vision cu Ministerio di Turismo tin. Den esaki APA ta mustra un vision hopi cla unda nan kier ta den e proximo 5 y 10 aña.

Den e Masterplan ta contene e desaroyonan economico hopi importante pa e proximo 10 añanan na Aruba. E plan aki a wordo desaroya despues di haci hopi investigacion conhuntamente cu Ports of Amsterdam cu ta yudando APA ya pa añas caba, asina e mandatario a trece dilanti.

Oduber a splica cu APA lo bay enfoca riba 4 pilar, lo bay enfoca den e terminal di carga na Barcadera. Lo bay sigui enfoca riba e turismo crucero, riba real estate cu ta e desaroyo di Port City y tambe r pilar maritimo. Oduber a menciona cu aña 2019 tabata un di e miho añanan pa barco crucero caminda a registra 832 mil turista crucero. Ta bay enfoca tambe mas riba e sector maritimo cu tambe ta genera basta entrada pa APA.

E proyecto di Port City ta canando bon y ta den su fase final pa por cuminsa, ya a sinta cu DIP caba y e cooperacion ta bayendo bon. E proyecto di “Port City” tin un inversion di 500 miyon dollar cu ta wordo financia pa sector priva. E proyecto aki sigur lo bay crea oportunidadnan nobo, lo bay crea cuponan di trabao y lo bay trece mas placa pa e caha di Gobierno. Oduber a expresa cu segun e modelonan economico, e proyecto aki lo bay contribui na 4% di Aruba su GDP ora e proyecto cuminsa.

Oduber a menciona cu den e Masterplan a repasa tur e inversionnan cu mester tuma lugar e proximo añanan pa por desaroya un turismo crucero duradero y sostenibel. Ta bay percura pa enfoca riba e 4 pilarnan cu ta Terminal di Carga – Turismo crucero – Real Estate – Martimo. Di e manera aki lo percura pa APA genera e entradanan pa yega back e nivel di aña 2019. Aña 2019 tabata e mihor aña den historia di APA caminda el a genera mas di 36 miyon florin. Despues di esaki na aña 2020 mundo a conoce e pandemia y esaki sigur a afecta e entradanan di APA drasticamente mirando cu e turismo crucero a cay por completo, e mandatario ta expresa. Oduber a sigui bisa cu segun e proyeccionnan ta te apenas na aña 2024 Aruba lo yega back na e nivelnan di e turismo crucero di aña 2019. Por lo general segun e Masterplan APA lo yega na nivel di aña 2019 cu tabata e mihor aña di APA na aña 2023, asina minister Oduber a trece dilanti.

Finalmente Oduber ta gradici gerencia di APA y Ports of Amsterdam pa entrega un tremendo Masterplan hopi bon hinca den otro cu ta bay hunga un rol hopi grandi den futuro desaroyonan economico pa Aruba.

LEAVE A REPLY

Please enter your comment!
Please enter your name here