Minister Dangui Oduber, Minister di Turismo, Salubridad y Deporte y conforme cu e plan di gobernacion su vision tabata pa reconoce nos yiunan di tera cu a specialisa den region den ramo di medicina y salud. Oduber a institui un comision asina yama “Commissie AruBIG” pa asina sinta hunto cu e profesionalnan den sector di cuido pa duna un conseho con pa logra esaki na un manera responsabel.
E comision aki, encabesa pa ministerio di salubridad, a reuni pa prome biaha na februari 2018. E mandato tabata cla “nos lo amplia nos registracion pa esnan trahando riba e tereno di salud na un manera responsabel dunando reconocimento na nos yiunan di tera cu a studia den region. E tabata un trayecto largo cu hopi discusionnan pero unda tin un vision y determinacion cu profesionalnan pa duna e miho conseho Aruba ta logra.
Despues di 3 aña di trabaonan intensivo awe Aruba ta conta cu un logro historico cual ta e introduccion di Landsbesluiten cu ta regla organonan di acreditation y criterionan di estudio cu ta reconoce estudionan den medicina den region. E Landsbesluiten aki ta regla cu banda di e registro di BIG di Hulanda, Aruba ta reconoce specialismonan den medicina acredita pa e siguiente organonan manera Sistema Nacional de Acreditacion de la Educacion Superior (SINAES) na Costa Rica, Consejo Nacional de Acreditacion (CNA) na Colombia, Education Commission for Foreign Medical Graduates (ECFMG) na Merca y Medical Council of Canada (MCC) na Canada. E otro Landsbesluit cu lo drenta na vigor 15 di mei 2021 ta regla e criterionan di estudio basa ariba e principio cual ta yega cerca di e sistema di educacion di Canada y Hulanda y ta traha den exchange programmes.
Despues di e sondeo den region e siguiente Universidadnan ta cumpli cu e criterianan stipula: Universidad de Costa Rica (UCR),Universidad de Ciencias Medicas (UCIMED) y Universidad Latina de Costa Rica. Pa Colombia e siguiente universidadnan ta cumpli cu e criterio cualnan ta Universidad El Bosque y Pontificia Universidad Javariana. E profesionnan den sector di medicina cu dentro di 3 luna cuminsa registra ta dokter, boticario, partera y fisioterapista conforme e Landsbesluiten aki.
Pa loke ta trata e specialismo di dentista, esaki tambe ta canando e proceso pa wordo introduci. E ampliacion aki lo duna mas oportunidadnan y crea mas resiliencia den nos sector di salud publico. Segun un comunicado di prensa, di e forma aki gobierno di Aruba ta cumpli cu su vision cual ta trece bek nos yiunan di tera y profesionalnan den sector di medicina y cuido pa asina yuda reenforsa nos salubridad publico. Ademas e ampliacion aki lo crea mas oportunidad na nos profesionalnan pa specialisa aki na Aruba mes por medio di convenionan cu institutonan reconoci manera NSPOH.
“Aruba y nos yiunan di tera pabien cu e logro historico aki. Un danki ta bay pa e team di Ministerio di Turismo, Salubridad y Deporte, Departamento di Salud Publico, Inspectie Volksgezondheid Aruba y tur otro stakeholders den salud publico cu a yuda pa esaki bira un realidad.”
