Diaranson mainta Minister di Salud Publico Sr. Dangui Oduber a haci traspaso di tur su trabaonan di maneho di adiccion y salud mental pa colega Minister di Husticia y Asuntonan Social Sr. Rocco Tjon cual lo resorta bao di su ministerio awor.
Segun un comunicado di gobierno, den e encuentro ameno aki Oduber hunto cu su ekipo a duna Tjon un bista riba tur locual a wordo haci den e area di adiccion y salud mental durante e ultimo 4 añanan. Oduber a elabora ampliamente riba locual tabata su maneho, locual e la logra y temanan di importancia cu mester tene cuenta cune.
Den e traspaso aki departamentonan y fundacionnan relaciona cu adiccion y salud mental cu tabata resorta antes bao di Ministerio di Salud Publico, awor lo bay resorta bao di Ministerio di Asuntonan Social. Departamento cu a keda traspasa ta entre otro Social Psychiatrische Dienst, Geestelijke Gezondheid Zorg pa menciona un par. Fundacionnan cu a keda traspasa relaciona cu adiccion y salud mental ta entre otro FMAA y FADA.
Oduber a hiba un maneho serio y responsabel e ultimo 4 añanan unda cu a duna atencion poniendo e fondonan disponibel pa mehora e cuido pa esnan cu ta sufri di salud mental y esnan cu ta bringa adiccion. A traha di cerca cu PAHO pa mehora e cuido y a acerca Mental Health Caribbean cu a concretisa e mandatario su vision y mision riba e tereno di salud mental y adiccion. A enfoca riba un maneho integral di psikiatria y adiccion, reconociendo adiccion como un malesa mental.
Un maneho caminda e cuido ta yega cerca esnan cu mester di dje y teniendo na cuenta e necesidad di e cliente. A rebiba e departamento di SPD biniendo cu e FACT Team cu pa prome biaha a enfoca riba e menornan di edad cu ta sufri di salud mental y/of adiccion. E FACT Team ta un team ambulante cu ta yega cerca e pashent pa asina duna nan e guia y ayudo den nan contexto.
Oduber a haci hopi trabao pa percura pa mehora e cuido di esnan cu ta sufri di adiccion y salud mental pero naturalmente tin hopi trabao ainda pa wordo haci. Den esaki Oduber ta desea colega Tjon tur clase di exito pa su cargo nobo.
