Manera ta conoci por medio di e fondonan di Social Crisis Plan y conforme cu e vision di Minister Dangui Oduber un FACT-team Kind en Jeugdzorg a ser estableci na september 2019. FACT-team ta resorta bou di e departamento di Sociaal Psychiatrische Dienst (SPD) di DVG.

E Fact-team aki ta un team ambulante cu su meta ta pa trata mucha y hobennan te cu 24 aña di edad cu tin problema mental.

Den 10 luna di tempo e FACT-team aki a conta cu un total di 134 reporte di casonan. E casonan raporta tin di haber na prome lugar cu problemanan di conducta sigui pa diagnostico di depresion, problema relaciona cu personalidad y ansiedad. E casonan aki ta bin dilanti mas tanto entre e edad 12-17 aña, sigui pa 7-11 y 18-24. FACT team a crea asina su credibilidad cu nan a caba establece un cooperacion cu e Stichting DornaSol pa asina duna guia na e alumnonan di e scol aki.

Minister Oduber ta contento y satisfecho cu e FACT-team aki ta logra detecta problemanan serca nos hobennan na un edad jong paso esaki ta e unico manera cu por trata nos hobennan y nan famia na tempo pa asina evita complicacion riba e tereno di salud mental a largo plaso. Minister ta contento di wak su vision cual ta detecta problema mental, trata esaki pa asina duna perspectiva na esnan mas vulnerabel den nos pais specialmente nos muchanan y hobennan.