Diaranson mainta na Rodgers Beach, San Nicolas, Minister di Turimo y Salubridad Publico, Sr. Dangui Obuber a tene un conferencia di prensa caminda el a presenta e proyecto di renobacion d e trapi di Rodgers Beach  tambe a elabora ariba e master plan cu Gabinete Wever-Croes kier ehecuta pa mehoracion di San Nicolas durante e proximo 4 añanan. 

Minister Oduber a habri su conferencia di prensa admirando e bunitesa di e area di Rodgers Beach, un area cu lastimamente a wordo lubida y bandona pa hopi aña pa motibo di falta di inversionnan cu mester a wordo haci cu mester a percura pa mantene e infrastructura. “Awe nos ta para na e trapi, cu manera por wak ta den un estado di decadencia, pa nos por anuncia un otro bunita proyecto pa San Nicolas den e caso aki”, Minister Oduber a bisa.

El a splica cu na momento cu gobierno a drenta mandato na 2017 nan tabatin un vision y un master plan pa San Nicolas y den e plan aki a inclui e proyecto di Baby Beach fase uno y fase dos, nan a inclui renobacion di e oficina di turismo na San Nicolas, a bin cu e festival nobo ‘Island Fest’ y el a indica tambe cu gobierno kier percura pa mehora e infrastructura di Rodgers Beach.

Durante e prome periodo e Ministerio di Turismo a percura pa entrega e proyecto di Baby Beach fase uno. El a splica cu e intencion y compromiso di e ministerio ta pa sigui cu fase dos den Gabinete Wever-Croes II y mehora e area di San Nicolas pa asina atrae e tipo di turismo cu lo yuda mehora e economia di Aruba.

Conforme e maneho y e vision cu nos kier pa nos turismo, nos kier focus ariba e turismo di low volume high impact, e turista afluente, e turista cu tin un entrada anual di 150 mil dollar pa aña y naturalmente ora bo ta focus ariba e grupo aki, e grupo aki tambe tin cierto expectativa di e  producto Aruba. Semper Aruba a wordo considera un producto di calidad y pa bo cumpli cu e expectativa cu e trusita tin, vooral e turista afluente, nos tin cu keda haci inversionnan den nos producto Aruba”, el a splica.

Segun Minister Oduber a indica, nan a identifica diferente area caba, basa riba un estudio di Carying Capacity, caminda lo percura pa un visitor flow management mehora tambe y caminda lo reparti tur e cantidad di turistanan cu ta bishita nos isla den e diferente areanan na Aruba. E ta enfatisa cu un di areanan cu sigur gobierno ta mira y ta considera como un potencial enorme ta Baby Beach cu pa añanan largo hopi turista ta bishita.

El a splica tambe cu e Ministerio di Turismo ta percurando pa e mehoracion di infrastructura pa tin e facilidad pa e turistanan pa Baby Beach y aworaki lo enfoca tambe ariba Rodgers Beach.. “Esaki ta e inicio di e ehecucion di e masterplan cu nos ta bay sigui pone hopi atencion aden pa renoba e trapi aki cu pa hopi tempo mester a wordo renoba”, el a bisa. “E ta den un estado hopi malo y nos ta kere cu e renobacion  di e trapi aki ta bay sigur duna e comienso na e futuro briyante cu nos ta mira pa San Nicolas”.

Minister Oduber a menciona tambe e inversion haci  inverti tambe den e dos piernan y Ministerio di Turismo ta den discusion ainda cu Parke Marino pa finalisa e proyectonan aki pasobra e meta ta pa mehora e area pa ponele disponibel tambe pa e famianan Arubiano y tur persona cu ta biba na Aruba por bishita Rodgers Beach y  haci uso di e pier.

Nos ta kere den e proyecto di e piernan tambe, nos tin e compromiso pa sigui cu e proyecto y pa henter e area di Rodgers Beach nos ta compromete nos mes awe tambe, no solamente pa drecha e trapi, si noh mescos cu nos a haci na Baby Beach nos kier inverti den infrastructura, crea espacionan di parkeo, nos kier crea facilidadnan, bañonan pa turista y local y tambe bin cu un restaurant of un kiosko cu ta ofrece cuminda y bebida na localnan y tambe pa turistanan pasobra nos ta kere cu San Nicolas tin tur e potencial pa bira un capital turistico”, el a agrega.

El a informa tambe cu recientemente e inversionistanan cu a anuncia e proyecto di Secrets Hotel tabata na Aruba y nan a expresa cu nan compromiso cu e proyecto di mehoracion di San Nicolas ta sigui. El a splica cu Ministeerio di Turismo y gobierno lo sigui inverti den e proyectonan di San Nicolas y tambe den e San Nicolas Visitor Informacion Center, pa di e forma ey nan ta cumpli cu e master plan cu Gabinete Wever-Croes II kier ehecuta pa e siguiente cuater añanan y percura pa San Nicolas realmente haya e atencion necesario pa asina por haci di San Nicolas e capital turistico cu nan ta desea di haci.

Minister Oduber a splica cu e expectativa ta pa cuminsa cu e renobacion di e trapi di Rodgers Beach prome cu fin di aña pa asina termina y entrega e proyecto aki e aña aki ainda. El a indica tambe cu e proyecto di e trapi ta wordo financia pa ATA conforme e maneho y vision di Ministerio di Turismo.

“Nos ta contento awe cu nos por inicia e comienso di un hopi bunita proyecto pa San Nicolas pa turistanan y tambe localnan. A yega ora pa pone accion na palabranan y haci inversionnan necesario pa nos percura pa tin un bon infrastructura, mehora henter e area aki”, el a bisa.

LEAVE A REPLY

Please enter your comment!
Please enter your name here