Diahuebs anochi, Minister di Deporte sr. Dangui Oduber a bishita na Sport Club United na Noord, pa duna e club e bon noticia cu pronto e veld lo haya luznan LED. Veld di United no tin iluminacion, p’esey esaki ta sumamente necesario.

Pa realisa e iluminacion, veld di United lo bay conoce trabounan di infrastructura riba e parti di electricidad prome y despues lo instala e luznan. E trabounan aki ta bay wordo realisa cu fondonan di entre otro Ministerio di Turismo Salubridad Publico y Deporte y Aruba Voetbal Bond.

Veld di United ta conoci na Aruba pa practica e deporte di futbol y tambe sa tin competencia di hisamento di fli. Veld di United ta bay bira e di tres veld cu ta haya iluminacion nobo, ricibiendo asina e atencion debido di Gobierno.

Deporte ta un instrumento importante pa nos pais. E ta percura pa entre otro un bida mas saludabel, tanto fisico como mental, e ta tene hobennan leu di delincuencia y ta siña nan disciplina. Sin deporte, un nacion no tin bida. Pa e motibonan aki, Oduber ta haya importante pa deporte na Aruba haya e atencion debido.

“Oduber ta sigui cumpli a pesar cu e fondonan pa deporte ta hopi limita, asina mes a haci hopi pa deporte. A pesar cu deporte ta secuestra pa e cartel di lotto na un manera creativo ta yudando den deporte”, segun un comunicado di gobierno.

E mandatario a menciona cu a yuda diferente clubnan cu material, airco y iluminacion. Intencion ta pa poco poco drecha den tur bario caminda tin necesidad pa cu deporte.

Oduber kier a felicita e dirigentenan y e hungadonan di Sport Club United cu pronto lo tin nan luznan nobo y desea nan tur clase di exito cu nan prome aña den division di honor. Finalmente e mandatario a gradici Aruba Votbal Bond pa nan cooperacion den e proyecto menciona.

 

LEAVE A REPLY

Please enter your comment!
Please enter your name here